Prezidente PN: povu sente orgullu ba Don Virgílio sai Kardeál dahuluk iha TL

DILI, 06 setembru 2022 (TATOLI)— Prezidente Parlamentu Nasionál, Deputadu Aniceto Longuinhos Guterres Lopes, hateten lori Governu, Parlamentu Nasionál no Povu Timor-Leste nia-naran hato’o parabés no orgullu ba Don Virgílio Kardeál do Carmo da Silva, SDB, ne’ebé simu ona investidura hosi Papa Francisco, hodi sai bibi-atan atu tau matan ba sarani katólika iha Timor-Leste.
“Ha’u ohin iha ne’e, nu’udár reprezentante povu Timor-Leste nian, hato’o agradese ba Maromak liuhosi prezensa Don Virgílio Kardeál do Carmo nian, ami hotu nia profundu parabéns no votu susesu bá Kardeál dahuluk Timor-Leste nia tanba kargu dignitáriu iha Igreja Katólika, hodi hametin fiar sarani nian iha Timor-Leste no iha igreja universál,” katak Prezidente PN ne’e, hafoin misa agradesimetu ba Don Virgílio Kardeál do Carmo da Silva SDB, iha uma Laco São João Paulo II Tasi-Tolu,Dili, tersa ne’e.
Notísia relevante: Eminénsia Don Virgílio Cardeal konvida sarani moris tuir Maromak nia santuáriu
Tuir Prezidente PN katak kna’ar ne’ebé Don Virgílio Kardeál hetan sente orgullu boot ba Timor-Leste, nu’udar nasaun no povu, maski nasaun ki’ik, maibé hatudu nia identidade fiar sarani ne’ebé ativu, no moris ho dame hamutuk Timoroan seluk ne’ebé fiar iha relijiaun seluk.

Tanba, orgullu ne’e hatuur kedas iha istória evanjelizasaun iha Timor-Leste, iha tempu naruk ba kotuk ne’ebé konstrui hosi povu Timor-Leste nia identidade rasik, iha Sudeste Aziátiku ne’ebé sai fundamentu ba Timor-Leste nia independénsia.
Prezidente PPN ne’e dehan ho kna’ar ne’ebé Kardeál foun simu ne’e sei la preokupa de’it, igreja katólika iha Timor-Leste, maibé halo parte mós iha Ministériu Amu Papa nia piadade no prudénsia hodi reforsa igreja universál.
“Grasa ne’e hatun de’it ba Don Virgílio, maibé ba ita sarani hotuhotu no ita idaidak. Tanba ne’e ita timor-oan hotuhotu tenke iha devér morál atu presta ita-nia apoia morál no orasaun ba Don Virgílio nia kargu foun ne’e,” PPN ne’e sujere.
Reprezentante povu ne’e, relembra Tasi-Tolu iha tinan 33 liuba iha 12 outubru 1989, Santo Padre João Paulo II, hamutuk ho Administradór istóriku Don Carlos Filipe Ximenes Belo, hamutuk ho Padre, Madre no sarani sira, selebra festa santa misa iha fatin Tasi-Tolu ne’e, hosi Santu Papa João Paulo II nós hosik hela mensajen ida katak “imi masin rai nian no naroman mundu nian” no ohin dala ida tan sarani Timor-Leste selebra tan festa boot misa agradesementu Kardeál nian iha fatin istóriku ne’e.

Parlamentu Nasionál mós aprova rezolusaun ida hodi deklara adezaun Timor-Leste, ba deklarasaun kona-ba Fraternidade Umana, bá Pás mundiál no konvidénsia komum.
“Fraternidade Umana no ba Pás mundiál ne’e konvidénsia komum nu’udár eventu istóriku boot kona-ba fé no umanidade mosu tuirtuir malu iha tempu badak ne’ebé iha situasaun mundu nakonu ho konflitu, violénsia, hamlaha no dezafiu barak hasoru ema-nia fiar ba Maromak,” akresenta.
Povu Timor-Leste iha esperénsia kona-ba konvivénsia no relasionamentu nu’udár sidadaun iha poder rua ne’e nia-laran mak ho prezensa amo Kardeál nian iha Timor-Leste no Timor-Leste nia adezaun deklarasaun ba Fraternidade Umana hotuhotu hala’o obrigasaun nu’udár sarani fiar na’in tuir idaidak nia relijiaun.
Alende ne’e, deklarasaun Fraternidade Umana mós hanorin sidadaun nasaun ida-idak atu kumpre nia dever nu’udár fiar na’in no polítiku, Governante ka sidadaun baibain hodi hametin pás relasaun fraterna, solidariedade no toleránsia konstrutiva.
“Konfinsa Santa Sé ba autoridade ekliziástika, ba governante no polítiku sarani Timor-Leste, bele ezemplar ba fiar no fraternidade umana iha mundu,” PPN konklui.
Notísia relevante: Sarani lubun entusiazmu partisipa misa agradesimentu no resesaun Kardeál iha Tasi-tolu
Jornalista : Arminda Fonseca
Editór : Florencio Miranda Ximenes

