DILI, 07 setembru 2022 (TATOLI)—Diresaun Nasionál Ensinu Rekorrente hosi Ministériu Edukasaun Juventude no Desportu (MEJD), iha fulan-outubru sei realiza ezame ba estudante 474 hosi nível ensinu primária no ensinu báziku iha sentru komunitáriu aprendizajen ualu.
Diretór Nasionál Ensinu Rekorrente, Quintão da Costa Massa, relata dadus estudante 474 ne’e la tama kategoria dadus nasionál tanba dadus sira ne’e diresaun foti hosi sentru komunitáriu aprendizajen ualu iha munisípiu neen.
“Estudante sira sei partisipa iha avaliasaun no ezame nasionál nivel ensinu báziku iha loron 23 outubru. Ho ida bele dehan sira sei livre an-hosi alfabetizasaun,” Diretór hateten ba Agência Tatoli, iha ninia knaar fatin, Vila Verde, kuarta ne’e.
Notísia relevante: MEJD prevee orsamentu $21.000 ba sentru komunitáriu aprendizajen
Nia dehan, Timor-Leste laiha ona analfabetizasaun tanba Estadu no Governu rasik deklara katak livre ona.
Tuir nia, kauza hosi analfabetizasaun tanba situasaun polítika momentu ne’ebá, ne’ebé movimentu timor-oan balun nian la livre atu asesu ba edukasaun adekuadu no balun mós tanba problema ekonomia halo sira labele finaliza estudu.
“Maibé hafoin ukun-an, Governu loke diresaun ida-ne’e iha Ministériu Edukasaun nia mahon atu apoiu timor-oan sira ne’ebé maka hakarak kontinua eskola hodi hetan diploma formál bele partisipa iha edukasaun naun formál hodi bele hetan diploma. Tanba ne’e ohin loron laiha tan ona joven ida maka tama iha kategoria ne’e, maibé joven droop out (abandona eskola) maka agora sei kontinua iha,” nia akresenta.
Hosi programa ne’e rasik, Diresaun Nasionál Ensinu Rekorrente alokasaun orsamentu hamutuk $75.528 hodi apoiu departamentu tolu ne’ebé eziste hanesan departamentu asesu kualidade, programa no administrasaun.
Munisípiu neen ne’ebé maka agora apoiu hela programa analfabetizasaun ba estudante na’in-474 ne’e maka hanesan Baucau, Viqueque, Manufahi, Aileu, Ermera no Dili.
Jornalista : Tomé Amado
Editora : Julia Chatarina
