iklan

INTERNASIONÁL, HEADLINE

PR presta omenajen ba éroi Australianu Funu Mundiál II

PR presta omenajen ba éroi Australianu Funu Mundiál II

Prezidente repúblika, José Ramos Horta tau ai-funan iha ‘Australian war memorial’, iha Canberra, ohin. Imajen Tatoli/Rafy Belo

CANBERRA, 08 setembru 2022 (TATOLI)–Prezidente Repúblika, José Ramos Horta, kinta ne’e, presta omenajen no tau ai-funan ba éroi no martir australianusira- ne’ebé lakon vida iha Funu Mundiál daruak (II) inklui funu iha nasaun seluk, iha Australian War Memorial, iha Canberra.

Notísia Relevante: Timor-Leste ho Austrália asina akordu kooperasaun defeza

“Ohin dadeer vizita memoriál militár Australianu sira, iha tinan 100 nia laran mate iha funu iha rai barak ne’ebé mak uluk, bainhira Austrália sei kolonia ingleza, Kóroa británika mak haruka sira ba iha fatin lubuk ida iha mundu, ne’ebé iha funu hanesan iha Sudaun, iha Galipoli Turkia,” Prezidente Repúblika hateten ba jornalista sira iha Embaixada Timor-Leste iha Canberra, hafoin presta omenajen no tau ai-funan.

Tuir prezidente repúblika, iha mós referénsia espesífika iha Funu Mundiál daruak, Australianu sira-ne’ebé mak ba iha Timor-Leste.

“Timoroan lubuk ida tulun sira tanba timoroan nia apoiu mak australianu, barak salva aan, kombate hasoru Japonés sira. Rimoroan sira tulun forsa australiana sira, depois forsa japonés sira halo retallasaun no oho (timoroan) lubuk ida,” Xefe Estadu hateten.

Nia mós akresenta, iha tinan 1999, Forsa australiana liuhosi Forsa internasionál ba Timor-Leste (INTERFET, sigla inglés) marka mós prezensa iha Timor-Leste.

“Entaun iha fatin ida-ne’e (Australian war memorial)-fatin boot ba Timor-Leste, tanba Austrália nia prezensa iha Timor-Leste, entaun emotivu tebes,” Prezidente Repúblika konsidera.

Iha ‘Australian war memorial’ ne’e, haree mós oinsá sosiedade australiana hatudu respeitu no iha inspirasaun ba ‘liman-kro’at’ australianu no seluktan ne’ebé halo sakrifísiu ba Austrália no kauza sira seluk. “Iha Timor-Leste sira-nia kontribuisaun ba dame”.

Iha parte seluk, Xefe Estadu rekoñese katak hahú Primeiru Governu Konstitusionál to’o ohin loron, maske hasoru difikuldade oioin, Timor-Leste mós hatudu ba jerasaun sira-ne’ebé sei moris depois 1999, Timor-Leste iha difikuldade maibé buka halo buat hotu para fó-onra ba martír no éroi sira-ne’ebé mak lakon sira-nia vida mak hahú ho ‘Jardin dos Herois’ Metinaro, Dili.

“Prosesu ne’e la’o daudaun, nune’e hakoi sira ho dignidade no fó-omenajen,” nia dehan.

Prezidente repúblika haktuir tan, bainhira hasoru-malu ho Diretór Matt Anderson, nia rona katak’ Australian war memorial’ sei buka nafatin ba sira-ne’ebé mate uluk no seidauk nafatin hetan, hanesan mós iha Timor-Leste.

“Ne’eduni, ita ba haree, hanesan mós parte ida ba ita. Timor-Leste importante tebes iha istória Austrália nia. Hametin liután povu Timor-Leste noAustrália. Metin mós ho Timor-Leste no povu Indonézia,” nia hateten.

Inspesaun parada militár

Depois presta omenajen no tau ai-funan, Prezidente repúblika, José Ramos Horta akompaña hosi Ministru Defeza, Filomeno Paixão no ekipa delegasaun, kontinua hala’o vizita ofisiál ba rezidénsia Governadór jerál Austrália, David Hurley.

Prezensa Xefe Estadu timoroan ne’e simu ho parada militár. Iha parada miliár ne’e, hafoin kanta inu nasionál Timor-Leste “Pátria!, Pátria!”, Xefe Estadu hala’o inspesaun parada militár ba forsa Australianu no ikus konklui ho sorumutu badak entre líder timorense no australianu ne’e.

Entretantu, bainhira Prezidente Repúblika, José Ramos Horta, akompaña hosi Ministru Filomeno Paixão de Jesus inklui ekipa delegasaun ba iha Australian war memorial, simu direta hosi Diretór Australian war memorial, Matt Anderson.

Tuir ajenda, kinta (08/09) ohin, nu’udar loron ikus vizita Xefe Estadu iha Canberra no aban sei kontinua ba Sydney.

Jornalista : Rafy Belo

Editór       : Cancio Ximenes

iklan
iklan

Leave a Reply

iklan
error: Content is protected !!