iklan

NASIONÁL, DILI, HEADLINE, SEGURANSA

CAC sosializa lei rejime deklarasaun rikusoin ba PNTL

CAC sosializa lei rejime deklarasaun rikusoin ba PNTL

CAC sosializa lei deklarasaun rikusoin ba Kargu Xefia sira iha PNTL.Imajen/Hortencio Sanchez

DILI, 9 agostu 2022 (TATOLI) – Komisaun Antí-Korrupsaun (CAC, sigla portugés), sesta ne’e, halo sosializaun lei númeru 7/2020 kona-ba Medida Prevensaun no Kombate Korrupsaun (MPCC,sigla Protugés) ba kargu Xefia sira iha Polísia Nasionál Timor-Leste (PNTL).

Objetivu halo diseminasaun informasaun relasiona rejime Deklarasaun Rendimentu Bens Interese ba funsionáriu no kargu xefia PNTL ninian, hodi nune’e kargu xefia sira ho ninia membru agregadu familiár sira bele rejista deklarasaun ba riku.

Notísia relevante:  CAC disemina rejime deklarasaun rikusoin ba Kargu Xefia Agência TATOLI, I.P

“Iha lei númeru 7/2020 ne’e, ezije ajente Estadu sira atu deklara sira nia rikusoin inklui Komando Polísia Nasionál Timor-Leste, ne’ebé asume kargu hanesan Diretór hanesan responsável sira iha área relevante sira iha Komandu Jerál, Nune’e ami sosializa lei ne’e para sira iha koñesimentu atu partisipa ka kontribui iha prosesu ne’e,” Komisáriu Adjuntu ba Prevensaun no Sensibilizasaun CAC, Luis de Oliveira Sampaio, hateten ba Agência TATOLI iha Dili, sesta ne’e.

Iha lejizlasaun ne’e fó biban ba CAC atu kontrola kargu xefia no Diretór sira atu labele komete korrupsaun ruma durante mandatu iha institusaun Estadu sira.

“Ita nia sosializasaun ne’e atu relata mós tékniku balun oinsá prenxe formulariu liuhosi plataforma online ne’e, no karik kargu xefia PNTL balun hasoru difikuldade téknika sira kona-ba oinsa prienxe sistema bele konvida CAC atu ajuda,” nia afirma.

Hafoin Lei Medida Prevensaun no Kombate Korrupsaun (MPCC, sigla portugés) ho artigu hamutuk 117, tama ein vigór no kompleta ona loron 180, iha loron 22 fevereiru 2021, maka ekipa hosi CAC hahú halo diseminasaun ba ajente públiku, liuliu kargu xefia sira.

Lei MPCC iha artigu 29 to’o 30 ne’e fó obrigatóriu ba iha ajente públiku sira ne’ebé kaer hela kargu polítiku no kargu xefia iha funsaun públika iha instituisaun Estadu, diretór nasionál to’o mai xefe departamentu iha obrigasaun atubele  aprezenta sira-nia deklarasaun bens no interese.

Funsionáriu Estadu ne’ebé asume kargu xefia sei deklara sira-nia rikusoin inklui sira-nia família ba CAC bainhira lei ne’e hahú implementa.

Iha kapítulu II Rejime Deklarasaun Bens no Interese, artigu 28 obriga kualkér sidadaun ne’ebé asume karu públiku tenke deklara rikusoin.

Natureza hosi artigu ne’e ko’alia kona-ba ema sira ne’ebé atu halo deklarasaun, hanesan sira ne’e asume kargu polítika, deskrisaun ne’e mai to’o xefe departamentu no funsionáriu sira ne’ebé la’ós okupa kargu xefia, maibé pertense ba área sira konsidera altu risku ba korrupsaun.

Nune’e mós, ba funsionáriu sira ne’ebé iha área serbisu hanesan impostu, aprovizionamentu ba kontratu públiku, jestaun rai ho inspesaun tenke halo deklarasaun.

Notísia relevante: CAC halo adverténsia ba kargu xefia 300 relasiona deklarasaun rikusoin

Jornalista: Hortencio Sanchez

Editór        : Florencio Miranda Ximenes

iklan
iklan

Leave a Reply

iklan
error: Content is protected !!