iklan

DESPORTU, DILI, HEADLINE

Karketu Dili FC prontu partisipa liga Timorense époka 2022-2023

Karketu Dili FC prontu partisipa liga Timorense époka 2022-2023

Sekretáriu Jerál klube primeira divizaun Liga Futeból Timor-Leste (LFTL), Karketu Dili FC, Elizeu Isaac.Imajen/Hortencio Sanchez

DILI, 09 setembru 2022 (TATOLI) – Sekretáriu Jerál klube primeira divizaun Liga Futeból Timor-Leste (LFTL), Karketu Dili FC, Elizeu Isaac, hateten sira nia parte prontu partisipa liga Timorense époka 2022-2023, hodi kontribui ba dezenvolvimentu futeból iha Timor-Leste.

Tanba ne’e,  nia dehan hein desizaun hosi órgaun LFTL no Federasaun Futeból Timor – Leste (FFTL), atu enkontru iha loron 12 setembru 2022, bele deside data fiksu hodi hala’o liga Timorense.

“Ami prontu halo tuir desizaun saida de’it, bainhira parte rua tuur hamutuk  hodi deside haa’o liga Timorense, ami preparadu no prontu atu partisipa másimu tanba futeból iha nasaun ne’e tenke la’o ba oin,” dehan Elizeu ba Agência TATOLI iha iha Kampung Alor Dili, sesta ne’e.

Nia dehan, reuniaun entre parte rua tenke fó mós vantajen ba klube no jogadór sira.

“Reuniaun ne’ebé sira hala’o, ami sente sei hatudu sinál pozitivu, ami nia konfiansa tomak fó ba LFTL no FFTL. Órgaun rua ne’e iha paixaun boot ba futeból, paixaun boot ba futuru jogadór sira nian,” nia dehan.

Tuir nia dezafiu ne’ebé agora LFTL-FFTL hasoru agora sei la hamate vontade hodi lori futeból ba oin no sira fiar 100% liga sei hala’o iha setembru nia-laran.

Karketu prepara ona jogadór

Relasiona ho jogadór klube Kapitál Dili ne’e mantein ho jogadór anterior, maski jogadór balun, daudaun ne’e ba servisu ona iha rai-li’ur sira sei buka meiu hodi kontratu jogadór seluk bele troka sira nia fatin.

“Ami nia jogadór sira sempre kontaktu malu nafatin ho ami, ne’ebé maioria jogadór anteriór de’it, maibé ita sei buka jogadór foun balun hodi substitui jogadór balun ba ona servisu iha rai-liur,” nia dehan.

Kona-ba treinamentu seidauk bele hala’o tanba liga seidauk la’o no kalendáriu tentativu mós seidauk públika sai no kalendáriu públika ona mak foin bele halo treinamentu no renova jogadór-sira nia kontratu.

Alende ne’e, preparasaun ba administrasaun klube nian daudaun ne’e la’o másimu hela hodi hein data fiksu liga nian.

Jornalista: Hortencio Sanchez

Editór       : Florencio Miranda Ximenes

iklan
iklan

Leave a Reply

iklan
error: Content is protected !!