iklan

EDUKASAUN, HEADLINE

MEJD sei harii sentru exelente ba profesór

MEJD sei harii sentru exelente ba profesór

Diretór Jerál Administrasaun no Finansa hosi MEJD, Antoninho Pires. Imajen Tatoli/Egas Cristóvão

DILI, 09 setembru 2022 (TATOLI)–Ministériu Edukasaun Juventude no Desportu (MEJD) lansa ona programa Rais ho intensaun atu harii sentru exelente ida hodi tau-matan ba profesór sira ne’ebé maka tama iha kategoria atubele hadi’a liután kapasidade no abilidade.

Diretór Jerál Administrasaun no Finansa hosi Ministériu Edukasaun Juventude no Desportu (MEJD), Antoninho Pires, relata, daudaun MEJD kria ona fasilidade adekuadu atu apoiu prosesu estudu viabilidade.

“Ita agora monta ona sekretariadu ida atubele organiza atividade estudu viabilidade tanba ita presiza hetan sentru exelente hodi apoiu profesór sira,” Diretór hateten ba Agência Tatoli via telefónika, sesta ne’e.

Notísia relevante: MEJD hahú distribui karteira eskolár 2.000 ba eskola 16 iha Dili

Estudu viabilidade ne’ebé MEJD halo ne’e sei tama ba eskola hotu iha territóriu nasionál atu hatene kapasidade no abilidade profesór sira nune’e ba futuru kuandu instala sentru exelente ida bele akumula profesór sira ne’ebé iha abilidade no kapasidade atu aproveita.

Sentru exelente ne’e rasik seidauk termina atu harii iha ne’ebé tanba foin iha prosesu nia laran, maibé bainhira ekipa ne’ebé halo estudu ne’e finaliza ona maka bele hetan ona sentru ne’ebé di’ak ba profesór sira.

“Ita lakohi halo buat ida ho urjente, tanba programa ne’ebé ita kria daudaun ne’e di’ak duni atu ajuda ita-nia profesór sira liu-liu atu hasa’e sira-nia koñesimentu no abilidade hodi bele dezenvolve fali edukasaun iha ita-nia rain,” nia tenik.

Aleinde ne’e, MEJD mós iha esperansa katak programa no planu sira ne’ebé lansa daudaun ne’e sei hetan rezultadu di’ak atu lori edukasaun ba futuru di’ak liu. Tanba ne’e, Diretór husu kontribuisaun hosi parte hotu, liu-liu eskola sira iha territóriu nasionál no profesór sira atu apoiu prosesu estudu viabilidade ne’ebé ekipa ministériu sei halo iha tempu besik.

Jornalista   : Tomé Amado

Editora        : Julia Chatarina    

iklan
iklan

Leave a Reply

iklan
error: Content is protected !!