iklan

HEADLINE, POLÍTIKA

Somotxo : “Ha’u retira hosi membru CCF la’os sai hosi partidu FRETILIN”

Somotxo : “Ha’u retira hosi membru CCF la’os sai hosi partidu FRETILIN”

Ministru Defeza no Seguransa, José Agostinho Sequeira Somotxo.

DILI, 11 setembru 2022 (TATOLI)—Eis membru Komité Sentrál Fretilin (CCF, siga portugés), José Agustinho Siqueira Somotxo, hateten, nia parte retira de’it hosi membru CCF, maibé la sai hosi partidu FRETILIN.

“Ha’u deside sai hosi membru CCF, maibé la sai hosi Fretilin, tanba ha’u partikular raan Fretilin iha ha’u-nia isin, tanba ha’u-nia maluk membru CCF sira atu mate ne’e, sempre husik legadu ida atu ami kontinua,” José Agustinho Siqueira Somotxo, hateten, iha Sentru Konvensionál Dili (CCD, sigla portugés), domingu ne’e.

Nia hatutan, rezultadu iha kongresu Nasionál Frente Revolusionáriu Timor-Leste (FRETILIN) ba da-V hala’o loron tolu ramata horikalan nia ho maluk sira seluk foti desizaun retira hosi membru CCF ne’e, hakarak fó fali oportunidade ba maluk sira hodi serbisu maka’as liután hodi prepara vitória ba eleisaun 2023.

Nia hateten, partikulár hanesan kongresu hahú iha 08 ramata 10 setembru, normalmente sai kultura ona ba CCF, nian. Horiseik loron ikus sira halo revizaun ba estatutu ho rezolusaun barak, ikus mak fó pose ba membru kandidatu CCF, tanba realidade atuál ejize númeru boot ba membru CCF.

Tanba númeru membru CCF antes ne’e 75 agora tenke aumenta tán tanba ho nesesidade hamosu postu administrativu rua, Hatulia B Ermera no Lore iha Lautém no munisípiu foun Ataúro.

Tanba ne’e FRETILIN sempre akompaña dezenvolvimentu polítiku hanesan administrativu, maihosi munisípiu 40% ne’e estrutura munisípiu mak hili, no 60% lideransa mak hili.

“Ne’ebé fatin ne’e mak ami fó membru foun maibé serbisu nafatin hamutuk liseransa atuál atu FRETILIN manán iha 2023. Ha’u, Rui Maria de Araujo, Osório Florindo, Luis Lobato, ami tama iha 60% ne’ebé kompete lidransa atu hili, ami-nia naran iha ona ami asina tiha ona hanesan membru CCF ba mandatu ida tinan-lima,” nia hateten.

Nia dehan, nia parte tinan 10 ona iha CCF, problema sira ne’ebé horikalan mosu ejize sira fó hanoin ba sira katak liuliu nia ne’ebé tinan 10 ona iha CCF, tenke rekoñese katak fatin ne’e la’os ninian ne’ebé tuur nafatin iha ne’ebá.

“Entaun ami na’in-haat, Rui Maria de Araujo, Osório Florindo, Luis Lobato, ho inisiativa ajuda lideransa ami maihosi 60%, hanesan fó alternativa ida ba lideransa hodi halo desizaun, ne’ebé desizaun ha’u retira ne’e mak tanba CCF ida ne’ebé mai hosi 40% ne’e barak la konsege akumula hotu, entaun 60% ne’ebé pertense ba lideransa ne’e barak entaun ami inisiativa retira,” nia afirma.

Nia esklarese laiha ema ida atu haruka sira retira, maibé ne’e inisiativa rasik, ho razaun fó oportunidade fali ba sira ne’ebé maihosi baze ne’e tanba kuadru mesak didi’ak de’it, ne’ebé bele hanesan servisu di’ak no bele halo Fretilin manán iha munisípiu sira.

“Ami hanoin ida ne’e mak, ami hotu tenke fó konsiénsia fó fatin ba membru kuadru militante sira ne’ebé eleitu hosi munisípiu atu tur iha CCF,” nia subliña.

Jornalista : Arminda Fonseca

Editór : Evaristo Soares Martins

iklan
iklan

Leave a Reply

iklan
error: Content is protected !!