iklan

INTERNASIONÁL, DILI, HEADLINE

Cuba promete koopera ho Timor-Leste hodi kombate analfabetizmu

Cuba promete koopera ho Timor-Leste hodi kombate analfabetizmu

Reprezentante Embaixada Cuba iha Timor-Leste, José Ernesto Dias Perez. Imajen TATOLI/Antónia Gusmão

DILI, 12 setembru 2022 (TATOLI) – Governu Cuba, liuhosi Enkarregadu Negósiu Embaxada iha Timor-Leste, José Ernesto Días Pérez, hateten Cuba hakarak koopera ho Governu Timor- Leste, liuliu Ministériu Edukasaun Juventude no Desportu (SEJD), atu halakon analfabetizmu iha nasaun ne’e.

“Ami hato’o ona ba Governu Timor-Leste, kona-ba ami nia hakarak no komprimisiu atu servisu hamutuk hodi kombate analfabetizmu iha Timor-Leste,” dehan diplomata Cubano ne’e ba Agência TATOLI segunda ne’e.

Diplomata Cubanu ne’e hato’o kompromisu ne’e bainhira halo audénsia ho Ministru Edukasaun, Juventude no Desportu (MEJD), Armindo Maia iha Vila-Verde, Dili.

Governu Cuba ho Timor-Leste sei koopera hodi implementa programa “Yes, I Can Follow” no “Yes I Can Read” hodi halakon analfabetizmu iha Timor-Leste.

“La’os de’it program ida ne’e, maibé ami mós suporta ho programa adisionál rua ho objetivu atu hametin no hadi’ak liután abilidade literásia no numerásia báziku, entaun, programa rua ne’e atu ajuda maluk sira ne’ebé mk partisipa ona iha programa “Yes, I can”,” dehan nian.

Iha tempu besik, Governu rai rua ne’e hahú implementa progarama ne’e hodi kombate analfabetizmu.

Durante ne’e, Cuba apoia ona Timor-Leste iha área saúde no edukasaun hodi fó bolsa estudu ba timoroan 1.000-resin, hosi númeru ne’e daudaun balun serbisu iha fasilidade sáude sira hodi fó atendimentu médiku ba sidadaun sira.

Alende ne’e, Cuba mós oferese sira nia médiku espesialista sira iha Hospitál Nasionál Guido Valadares (HNGV), Ospitál Refereál no postu saúde sira iha territóriu nasionál.

Jornalista: Hortencio Sanchez

Editór      : Florencio Miranda Ximenes

iklan
iklan

Leave a Reply

iklan
error: Content is protected !!