Top

FIFA finaliza formasaun tékniku-fíziku ba árbitru timoroan na’in-29

Diretór Kompetisaun no Futeból Profisional iha Federasaun Futeból Timor-Leste (FFTL). Imajen Tatoli/Francisco Sony

DILI, 12 setembru 2022 (TATOLI) –Federation International Football Association (FIFA), sesta ne’e, finaliza ona formasaun tékniku no fíziku ba árbitru timoroan na’in-29.

Adjuntu Sekretariu Jeral Federasaun Futeból Timor – Leste (FFTL), Frederico Martins, informa árbitru na’in-29, termina ona sira nia formasaun durante loron lima, ne’ebé formadór mai hosi Federation International Football Association (FIFA).

“Formasaun ida ne’e halai liu ba nivél nasionál nian ne’ebé hala’o diretamente hosi FIFA Development referee. Formadór na’in-tolu mai hosi FIFA duni mak fó formasaun ba ita nia árbitru sira durante loron lima,” dehan Frederico iha salaun Xanana Sport Centre Dili, segunda ne’e.

Objetvu hosi formasaun ne’e atu mellora liután árbitru sira nia fíziku no tékniku, nune’e bele rejistu ba FIFA referee.

“Maibé, durante teste fíziku árbitru na’in-29, so na’in-rua de’it mak liu tanba sira nia idade la tuir ona kritériu ne’ebé mak iha, tanba idade atu rejistu hanesan membru ba FIFA referee tenke 23, entaun ida ne’e sai preokupasaun ida mai FFTL. Nune’e ami husi nafatin ba FIFA atu hala’o fali treinamentu hanesan ne’e iha tempu besik,” nia dehan.

Treinamentu ne’e hanesan meiu ida mós atu prepara rekursu FFTL nian hodi dirije jogu ruma ne’ebé akontese iha tempu besik, liuliu liga Timorense époka 2022-2023 ne’ebé sei hala’o tempu besik.

Maske, maioria la pasa iha teste fíziku, maibé formandu hirak ne’e simu hotu sertifikadu apresiasaun hosi FIFA hanesan evidénsia ida ba sira ne’ebé tuir ona formasaun ba FIFA referee.

Tuir dadus, árbitru iha Timor-Leste hamutuk 567, hosi númeru ne’e árbitru lisensa A na’in-rua, lisensa B na’in-10, lisensa C na’in-60 no restu iha lisensa D.

Jornalista  : Hortencio Sanchez

Editór          : Florencio Miranda Ximenes

Publisidade

Leave a Reply

Latest Post

error: Content is protected !!