Empreza prepara ona transporte 12 fasilita turista ró kruzeiru
DILI, 13 setembru 2022 (TATOLI)—Tour Guide hosi empreza Manny Timor Tour, Domenico Luís, hateten, daudaun prepara ona fasilidade transporte bus 12 hodi fasilita turista hosi ró kruzeiru Le Lapérouse ne’ebé sei to’o kuarta (14/09).
“Ita hatene aban, ita-nia ró kruzeiru sei tula turista sira to’o uluk iha Baucau no iha kinta (15/09) iha Dili. Ita halo ona preparasaun kondisaun másimu atu simu sira, liuliu iha Dili ita prepara ona karreta bus hamutuk 12 ne’ebé sei fasilita sira durante oras balun iha Dili,” Domenico Luís, informa ba Agência Tatoli, iha areadór edifísiu Agência Tatoli, Farol, tersa ne’e.
Notísia relevante: Ró kruzeiru Le Lapérouse Austrália to’o Timor iha loron 14 setembru
Atividade ne’ebé turista sira sei hala’o durante vizita iha Timor-Leste ne’e mak hanesan, aban bainhira sira to’o iha Uatoba Baucau no ba tasi no iha loron 15 setembru iha Dili sei vizita fatin istóriku hanesan Centro Nacional Chega (CNC), Asosiasaun Rezisténsia Timorense (AMRT), Santa Cruz no Cristo Rei.
“Ita mós prepara lokál guide sira, maibé ami mesak la to’o, entaun ami koopera ho estudante hosi universidade Dili Institute of Tecnology (DIT) no Univerisidade Nasionál Timor-Lorosa’e, ne’ebé ami prepara ema 14 sei fasilita turista sira la’o bá-mai durante iha Dili,” nia akresenta.
Bus ne’ebé sei prepara halo movimentu hosi Baucau-Dili no Dili-Maliana, ho kustu loron-ida ba kada bus hetan $100.
Aleinde ne’e, ajénsia ne’e servisu hamutuk ho Governu liuhosi MTKI hodi prepara toilet públiku, liuliu iha parte Cristo Rei.
“Ami koordena ona parte Governu atu haree hariis-fatin públiku ne’e tanba ita-nia fasilidade tour nian ne’e menus, maibé ita kolabora ona hodi haree situasaun ne’e,” nia tenik.
Empreza Manny Timor Tour rasik fasilita ona turista sira mai vizita Timor-Leste hamutuk 197 ne’e, ne’ebé mai hosi nasaun Austrália, Austria, Islándia, Portugal, Noruega.
Jornalista : Arminda Fonseca
Editora : Julia Chatarina
