La simu desizaun TDD, defeza arguidu FA sei submete rekursu ba TR
DILI, 13 setembru 2022 (TATOLI)— Defeza hosi arguidu FA, Estaqui Guterres, hateten nia parte hahú prepara rekursu hodi submete ba Tribunál Rekursu (TR) hodi kontra desizaun Tribunál Distritál Dili (TDD), ne’ebé antes ne’e aplika ona medida koasaun Prizaun Preventiva ba argudu FA, tanba konsidera hanesan trafikante ba ai-moruk droga mai Timor-Leste.
Kontéudu rekursu ba TR ne’e atu husu anula ka altera medida koasaun Prizaun Preventiva ba nia-kliente tanba laiha faktu ka prova ida ne’ebé hatudu katak arguidu FA ne’e hanesan trafikante ba ai-moruk droga iha Timor-Leste. Nune’e, husu atu TR halo alterasaun fali hosi medida koasaun Prizaun Preventiva ba fali Termu Identidade Rezidénsia (TIR).
Notísia Relevante: MP submete ona pedidu rekursu kontra desizaun tribunál ba kazu droga
“Ha’u prepara ona rekursu atu submete ba Tribunál Rekursu hodi kontra desizaun Tribunál Distritál Dili (TDD), ne’ebé aplika medida koasaun Prizasaun Preventiva ba ha’u nia kliente. Tanba desizaun ne’ebé aplika ba ha’u nia kliente la justu,” dehan Defeza arguidu FA ne’e ba Agência TATOLI iha Pateo, tersa ne’e.
Defeza Arguidu ne’e konsidera Juiza singulár, Maria Solana, foti desizaun ne’e bazeia ba deklarasaun hosi arguidu nain-sia nia, ne’ebé antes ne’e deklarasaun katak arguidu FA maka faan droga ba sira hodi konsumu.
Maibé, nia dehan bainhira iha prosesu buska domisiliáriu, detensaun no apreensaun bá iha arguidu FA nia rezidénsia, ekipa konjunta autoridade seguransa la hetan prova ruma ne’ebé hatudu kona-ba atividade ilísitu ba droga ne’e.
“Realidade iha interrogatóriu dahuluk ne’e, arguidu rasik deklara katak nunka envolve iha kazu droga, maibé tribunál nafatin konsitensia iha nia desizaun aplika medida prizaun preventiva ba ha’u nia kliente, hanesan parte defeza la simu desizaun tribunál tanba konsidera desizaun ne’e la justu,” Defesór Públiku ne’e lamenta.
Advogadu Estagui akresenta kompara ho arguidu na’in-sia, ne’e iha prova tanba sasán ilísitu iha no sira konsumu direta, maibé TDD aplika medida Koasaun Termu Identidade Rezidnsia (TIR) no Aprezentasaun Periodika ba arguidu sira.
Advogado hosi Defesór Públiku ne’e, mós lamenta desizaun TDD tanba desizaun ne’e la haree uluk ba kritériu sira ne’ebé previstu iha artigu 183 hosi Kódigu Prosesu Penál, maka TDD foin aplika medida koasaun prizaun preventiva ba arguidu ida.
Artigu 183 kona-ba rekizitu jerál, katak exeptu termu ba identidade no rezidénsia, medida-koasaun bele aplika de’it kuandu: arguidu halai, ka iha fundadu perigu ba arguidu atu halai, bele iha perturbasaun ba investigasaun ka ba julgamentu, nomeadamente tanba iha perigu ba prova nia akizisaun, konservasaun ka verasidade no iha fundadu perigu ba arguidu atu kontinua atividade kriminoza ka ba atu iha perturbasaun ba ordem no trankilidade públika, tuir krime nia sirkunstánsia ka delinkuente nia personalidade.
“Tribunál tetu tiha rekezitu sira ne’e maka foin aplika prizaun preventiva ba arguidu ida, maibé liga ho kazu arguidu FA nia arguidu rasik nia parte koopera iha inísiu ho autoridade judisiáriu no polisia hodi halo buska ba nia rezidénsia no iha buska ne’e la hetan prova,” nia lamenta.
Antes ne’e, Tribunál Distritál Dili (TDD), liuhosi prosesu primeiru Interrogatóriu iha Domingu (04/09), aplika ona medida koasaun Prizaun Preventiva ba argudu FA, tanba konsidera hanesan trafikante ba ai-moruk droga mai Timor-Leste (TL).
Iha prosesu primeiru interrogtóriu ne’e, Ministériu Públiku alega prizaun preventiva ba arguidu no promove iha lei númeru 02/2017, artigu 07 kona-bá kazu ilísitu ba droga.
Notísia Relevante: Kazu droga, membru PN preokupa TDD aplika TIR ba arguidu na’in-sia
Jornalista : Natalino Costa
Editór : Florencio Miranda Ximenes
