DESPORTU, DILI, HEADLINE

Sábadu, Mushila FC realiza family fun bike no konsertu múzika

Sábadu, Mushila FC realiza family fun bike no konsertu múzika

Prezidente komisaun organizadora ba atividade Family fun bike. Farão Belo. Imajen/Hortencio Sanchez

DILI, 13 setembru 2022 (TATOLI)– Prezidente Komisaun organizadóra ba atividade family fun bike, Farão Belo “Pai King”, informa sábadu (17/09), klube futsál Mushila FC realiza atividade fun bike no konsertu muzika hodi anima komunidade sira iha kapitál Dili.

“Ami hala’o atividade ne’e hodi anima de’it komunidade sira, tuir ami nia lema katak, família kontente, familia saudavél hodi moris iha kondisaun ne’ebé mak di’ak, programa ida family fun bike ne’e ami realiza beibeik ona kada tinan,” dehan Pai King ba Agência TATOLI iha Farol Dili, tersa ne’e.

Nia dehan, iha fulan hira ba kotuk sira hala’o hamutuk ho Banku Nasionál Komérsiu Timor – Leste (BNCTL), maibé semana ne’e halo hamutuk fali ho Timor Plaza no koopera mós ho Polísia Nasionál Timor-Leste (PNTL).

“Ami prepara premiu hamutuk 20 ba ema sira ne’ebé mai partisipa, maibé atu hetan premiu bainhira halai bisikleta hotu ona mak dada rifa atu s’e mak kona nia mak manán prémiu sira ne’ebé ami prepara ne’e. Dada rifa ho modelu rua ida ba labarik kiik no ida ba ema boot nian,” katak.

Rute ba kurida bisikleta hahú hosi Timor Plaza liu dalan protokulu ka Palásiu Governu oin no termina iha Kristu-Rei.

Programa ne’e mós ho objetivu atu bele eduka mós siklísta sira bainhira sa’e bisikleta tenke uza helem, kalan halai uza lampu no tuir dala ne’ebé mak iha.

“PNTL mós sei asegura ba dalan públiku sira, nune’e ami mós hakarak informa ba públiku katak iha sábadu (17/09), dalan balu sei taka provizóriu, maibé minutu balu sei loke fali hanesan Timor Plaza nian mai to’o Cristo-Rei,” nia relata.

Daudaun ne’e rejistrasaun hahú hala’o ona iha Timor Plaza ho osan ba rejistu mak $2. Osan hirak ne’e mak uza ba sosa fali prémiu hodi fó fali ba partisipante sira tanba ne’e tarjetu ba partisipante tenke to’o na’in-300.

“Atividade ne’e hosi sira, hamutuk ho sira no fila-fali ho sira partisipante. Buat ne’e ami halo atu anima de’it ita nia komunidade sira la’ós atu buka lukru husi programa ne’e,” katak nia.

Atividade ne’e hala’o tanba Mushila hetan apoiu másimu hosi Patrosinadór Federasaun Siklizmu Timor-Leste (FSTL), BNCTL, Telkomcel, TL Sport, NWTL, Fone House, Burger King, Insitutisaun Estadu sira hanesan Autoridade Nasionál Petróleu no Minerál (ANPM), PNTL no seluk tan.

Nune’e, nia husu ba Governu liu-liu Sekretariu Estadu Juventude no Desportu (SEJD) bele enkaixa mós programa family fun bike ne’e ba programa Governu nian atu nune’e iha selebrasaun loron boot sira bele utiliza.

Alende atividade fun bike iha kalan sei halo mós atividade konsertu muzika ne’ebé partisipa hosi artista Timoroan sira fatin Cristo-Rei.

“Ami hala’o atividade-sira ne’e dalan ida mós atu tulun ita-nia artista-sira tanba ita haree iha Timor-Leste artista barak halo múzika, maibé ladun hetan koñesimentu di’ak hosi Governu,” nia afirma.

Tanba ne’e, Mushila nia progarama no atividade atu tulun joven-sira iha área desportu no múzika hanesan mós kria kampu traballu ba joven-sira liuhosi atividade oioin.

Musila FC realiza ona atividade Family fun bike no konsertu múzika Mushila dala-haat ona iha Timor-Leste no ba oin sei kontinua realiza nafatin.

Jornalista: Hortencio Sanchez

Editór         : Florencio Miranda Ximenes

iklan
iklan

Leave a Reply

iklan
error: Content is protected !!