DESPORTU, DILI, HEADLINE

SEJD hahú peskiza kria lei regula Grupu Arté Rituál

SEJD hahú peskiza kria lei regula Grupu Arté Rituál

Sekretáriu Estadu Juventude no Desportu, Abrão Saldanha. Imajen Tatoli/Francisco Sony

DILI, 13 setembru 2022 (TATOLI)— Sekretáriu Estadu Juventude no Desportu (SEJD), Abrão Saldanha, informa ekipa SEJD ho KRAM hahú hala’o prosesu estudu ka peskiza atu kria lei ba Grupu Arte-Rituál (GAR).

SEJD hahú halo diálogu ho líderansa Grupu Arte Rituál (GAR) rua hanesan Sagradu Coração de Jesus “Coli-mau 2000” no Dalas Hitu “77” atu buka hatene lala’ok ba rekrutamentu ba membru foun organizasaun no seluk tan hodi hafasil kria enkuadramentu legál hodi kontrola no regula sira.

“Ami hahú rona sira-nia opiniaun no saida mak sira bele hanoin no atu buka hatene sira nia ezisténsia no sira-nia modelu organiza-aan tanba hosi ne’e bele haree fali bazé legál sira ne’ebé iha lei atu regula sira,” Sekretáriu Estadu Abrão dehan ba Agência TATOLI iha edifísiu SEJD-Lecidere-Dili, tersa ne’e.

Iha reuniaun ne’e, SEJD husu ba lideransa GAR atu fó kontribuisaun ba setór dezenvolvimentu rai laran nian liuliu kontribui ba pás no estabilidade atu populasaun hotu bele moris hakmatek.

“Ba ha’u-nia maluk prátikante arté marsiál sira atu ida-idak respeita ema seluk nia direitu ba sirkulasaun, hatudu ita bo’ot sira-nia maturidade hanesan ema ne’ebé treinadu hodi kontribui ba pás no estabilidade,” nia husu

Governu kontinua hamutuk ho GAR atu buka dalan hodi kria enkudramentu legál hodi kontrola no regula hodibele kontribui buat ba pás no estabilidade iha sosiedade nia-leet.

Iha fatin hanesan, Prezidente hosi GAR “Coli-mau 2000”, Napolião dos Santos, hateten nia-parte apoia ba prosesu no esforsu tomak ne’ebé Governu hala’o ona hodi halo estudu no peskiza hodi kria enkuadramentu legál ba GAR hodi sai organizasaun ida legál iha Estadu demokrátiku ida ne’e.

“Ami ho SEJD no Komisaun Reguladór Arté Marsiál (KRAM), koopera malu atu kria lejizlasaun hodi grupu ka organizasaun ne’e sai legál liuhosi iha estatutu. Ami prontu nafatin kontribui ba pás no estabilidade iha ita-nia rai laran,” nia kompromete.

Jornalista: Hortencio Sanchez

Editór      : Florencio Miranda Ximenes

iklan
iklan

Leave a Reply

iklan
error: Content is protected !!