TR notifika defeza arguidu na’in-sia hatán rekursu MP ba kazu ilísitu droga

DILI, 13 setembru 2022 (TATOLI)— Defeza hosi Defesór Públiku, Estaqui Guterres, informa nia-parte simu ona notifikasaun hosi Tribunál Rekursu (TR), hodi hatán ba rekursu Ministériu Públiku (MP), ne’ebc hato’o pedidu fiskalizasaun ba desizaun Tribunál Distritál Dili (TDD), antes ne’e aplika medida koasaun Termu Identidade Rezidénsia (TIR) no Aprezentasaun Periódika ba arguidu nain-sia, ne’ebé deskonfia envolve kazu tráfiku no llísitu ba droga.
Konteúdu notifikasaun hosi TR ba defeza arguidu nain-sia (9), hodi halo kontestasaun hasoru rekursu hosi MP nian ne’ebé la konkorda desizaun hosi tribunál primeira instánsia nian.
Notísia relevante: MP prepara rekursu kontra desizaun TDD ba kazu tráfiku no Ilísitu ba droga
“Ha’u simu notifikasaun hosi Tribunál Rekursu, ne’ebé husu ami hato’o ami nia kontestasaun hodi kontesta rekursu Ministériu Públiku nian ne’ebé la konkorda desizaun hosi tribunál primeira intánsia, ne’ebé antes ne’e aplika TIR no Aprezentasaun Periódika ba arguidu nain-sia ne’ebé envolve krime ilísitu ba droga,” Defensór Públiku ne’e, hateten ba jornalista sira iha edifisiu Diresaun Nasionál Notariadu, Colmera, tersa ne’e.
Iha karta notifikasaun ne’e, nia dehan TR husu ba parte defeza no advogadu nain-sia atu aprezenta kontestasaun hasoru rekursu MP-nian, molok Tribunál Rekursu foti desizaun.
Tuir nia, karta kontestasaun ne’e iha prazu loron 15 ba parte Defeza no Advogadu sira atu hato’o ba TR.
“Ha’u submete ona kontestasaun, ne’ebé nu’udar parte defeza ba arguidu nain-sia, haree desizaun ne’ebé maka tribunál primeiru instánsia hatun hodi aplika TIR no Aprezentasaun Periódika ida ne’e justu ba iha arguidu nain-sia tanba relasiona ho faktu sira ne’ebé maka iha,” nia afirma.
Entertantu Defeza no Advogadu ne’ebé maka antes ne’e fó asisténsia legál ba arguidu nain-sia ho inisiál DGS, MM, B, MAA, AY, SSO, M, CRMS no J, ne’ebé envolve krime ilísitu ba droga mak hanesan Defensór Públiku Estaqui Guterres, Albino de Jesus Pereira, Advogadu Privadu Arlindo Sanches, Fernado da Costa, Olívio, José Guterres, José Pedro Camões, Sergio Cancio Freitas no Napoleão de Oliveira.
Entretantu, Tribunál Distritál Dili (TDD), liuhosi Juis singulár José Gonçalves deside aplika medida koasaun Termu Identidade Rezidénsia (TIR) no aprezentasaun periódika ba arguidu na’in-sia, ne’ebé deskonfia envolve iha kazu ilísitu ba droga.
Razaun, TDD aplika TIR tanba konsidera laiha faktu sufisiente atu lori arguidu sira ba prizaun preventiva, tanba arguidu sira sai vítima ba konsumu de’it, maibé la’ós distributór.
Maske, iha prosesu alegasaun Ministériu Públiku husu Tribunál atu aplika prizaun preventiva ba arguidu sira tanba konsidera iha indísiu forte katak arguidu sira komete prátika konsumu no transaksaun ba droga.
Tuir nian lei númeru 2/2017, 25 janeiru, kona-ba kombate tráfiku no konsumu ilísitu ba droga. iha artigu 7 kona-ba tráfiku no atividade ilísita no artigu 9 kona-ba agravasaun utilizasun droga fó vantajen bá arguidu sira katak, hafoin medida koasaun ne’e, iha faze investigasaun nia laran mak sei iha klareza arguidu sira iha ligasaun ho sé de’it.
Notísia relevante: Laiha faktu sufisiente,TDD aplika TIR ba arguidu nain-sia ba kazu ilísitu droga
Jornalista: Natalino Costa
Editór : Florencio Miranda Ximenes

