Top

PNTL halo apreensaun motór 172 iha operasaun kalan

Polísia Nasionál Timor-Leste (PNTL), liuhosi Tránzitu Nasionál no Munisípiu Dili, halo apreensaun ba motor sira ne'ebé para kontra sinál tránzitu, iha Estrada-ibun Embaisada Portugal nia oin, kuarta (14/09). Imajen/Francisco Sony

DILI, 14 setembru 2022 (TATOLI)— Komandu Polísia Nasionál Timor-Leste (PNTL), Munisípiu Dili, liuhosi Unidade Tránzitu no ekipa Forsa Rezerva (Task Force), hala’o pasa revista iha tempu kalan, hahú hosi loron 8 to’o 14 setembru ne’e, konsege halo apreensaun ba motorizada 172, ne’ebé viola lei kódigu Estrada.

“Durante loron lima ne’e, konsege halo apreensaun ba motorizada hamutuk 172 no halo mós  apreesaun ba dokumentu motorizada no karta konduzaun ne’ebé mate hamutuk 35,” Komandante Polisia Nasionál Timor-Leste (PNTL), Munisípiu Dili, Superintendente Xefe, Henrique da Costa ba jornalista sira iha Komandu PNTL-Caicoli, kuarta ne’e.

Polísia Nasionál Timor-Leste (PNTL), liuhosi Tránzitu Nasionál no Munisípiu Dili, halo apreensaun ba motor sira ne’ebé para kontra sinál tránzitu, iha Estrada-ibun Embaisada Portugal nia oin, kuarta (14/09). Imajen/Francisco Sony

Daudaun ne’e, nia dehan evidénsia sira ne’ebé maka ekipa Tránzitu Dili halo apreensaun ne’e lori kedan ba iha Komandu PNTL Dili, nune’e na’in-ba motorizada sira selu multa iha Banku Nasionál Komérsiu Timor-Leste (BNCTL,sigla Portugés), hafoin mai foti sai nia-motór.

“Motorista balun selu ona koima no foti ona nia motór, maibé balun seidauk selu entaun sira-nia motór sei para hela iha ne’e. Tanba ne’e, husu ba ita motorista sira lori resivu ne’ebé maka iha sira hodi ba selu iha banku, nune’e bele foti sira nia motór,” nia afirma.

Iha pasa revista durante loron lima ne’e deteta sidadaun sira ne’ebé uza motór no karreta iha tempu kalan la monta asesoria hanesan espellu, laiha lampu, laiha xapa matríkulu no laiha karta kondusaun.

Nune’e, Komandu munisípiu Dili kompromete kontinua halo pasa revista iha tempu kalan, hodi bele kontrola no eduka sidadaun sira atu lori veíkulu tenke kumpre nafatin ba lei kódigu estrada hodi prevene asidente trafégu.

Jornalista: Natalino Costa

Editór      : Florencio Miranda Ximenes 

Publisidade

Leave a Reply

Latest Post

error: Content is protected !!