iklan

EKONOMIA, HEADLINE

FHM monitoriza atividade negosiante ambulante ne’ebé hetan karosa hosi Governu

FHM monitoriza atividade negosiante ambulante ne’ebé hetan karosa hosi Governu

Prezidente Fundasaun Hanai Malu (FHM), João Manuel Belo. Imajen Tatoli/Arminda Fonseca

DILI, 19 setembru 2022 (TATOLI)—Prezidente Fundasaun Hanai Malu (FHM), João Manuel Belo, hateten, kada fulan sempre halo monitorizasaun ba karosa ne’ebé Sekretaria Estadu Kooperativa (SEKoop) oferese ba negosiante ambulante 25 iha tinan kotuk.

“Karosa ne’e ita simu hosi SEKoop hodi fó ba kooperativa primária hanesan Klibur Uniaun ba Kréditu (KUK) hodi fahe ba ita-nia negosiante hamutuk 25 iha kapitál Dili no ekipa hosi KUK sempre halo monitorizasaun kada fulan ba benefisiáriu ne’ebé hetan,” Prezidente FHM relata ba Agência Tatoli iha ninia knaar fatin, Bairru-Pité, segunda ne’e.

FHM nu’udar instituisaun sekundária ne’ebé hamahon ba kooperativa primária iha Timór laran, tanba ne’e simu hosi SEKoop hodi kanaliza ba kooperativa primária KUK ne’ebé iha nia membru individuál hodi fahe direitamente ba negosiante.

Notísia relevante: SEKOOP sei apoiu kréditu ba negosiante ambulante 100

Bainhira benefisiáriu sira hetan karosa ne’e, difikuldadu ne’ebé negosiante sira hetan mak karosa ne’e todan entaun sira destaka de’it iha fatin mak halo atividade negósiu.

“Ita-nia negosiante sira ne’ebé hetan karosa ne’e maioria feto de’it no iha tempu kalan mak halo atividade negósiu hanesan fa’an sasán iha dalan ninin, fa’an etu, no seluk tan,” nia akresenta.

Benefisiáriu na’in 25 ne’ebé hetan karosa ne’e mai hosi membru kooperativa, ne’ebé antes ne’e sira fa’an sasán uza karosa ho kondisaun ladún di’ak no fasilita tebes.

“Benefísiu ba Governu mak karik halo ordenamentu iha sidade laran hatudu katak maski ita-nia negosiante sira ne’e ita labele bandu maibé sira mós fa’an sasán ne’ebé iha kualidade, entaun hatudu sidade nia imajen di’ak,” nia tenik.

Sorin seluk, Jestór Rekursu Umanu no Mobilizadór KUK, Jony Baptista Soares, hateten, kada fulan sira sempre halo monitorizasaun kondisaun karosa ne’ebé sira simu, karik iha buat balun ne’ebé presiza hadi’a, bele ajuda tanba karosa ne’e sira simu gratuita hodi halo atividade negósiu.

“Karosa sira ne’e negosiante sira simu gratuita, maibé osan ne’ebé sira uza halo negósiu foti hosi kooperativa, entaun FHM kada fulan tenke halo monitorizasaun hodi haree sira-nia kondisaun no foti osan funan ne’ebé sira foti iha kooperativa,” nia dehan.

Benefisiáriu na’in-25 ne’ebé simu karosa hela iha Dili no fa’an sasán iha parte Tasi-tolu, Caicoli, Bairru-Pité, Kampung Baru no fatin seluk tan.

“Bainhira ami halo monitorizasaun, negosiante sira hateten katak sira kontente tanba karosa ne’e ajuda tebes sira fa’an sasán hodi sustenta moris, maski karosa ne’e rasik todan,” nia haktuir.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!