DESPORTU, DILI, HEADLINE

Okupadu ho serbisu seluk, Nilton Gusmão deside rejigna-aan hosi kargu Prezidente LFTL

Okupadu ho serbisu seluk, Nilton Gusmão deside rejigna-aan hosi kargu Prezidente LFTL

Prezidente LFTL, Nilton Gusmão. Imajen Tatoli/dok.

DILI, 19 setembru 2022 (TATOLI) – Prezidente Asembleia Liga Futeból Timor-Leste (LFTL), Miguel Manetelo, informa nia-parte simu karta rejignasaun hosi Prezidente LFTL, Nilton Gusmão, iha loron 16 setembru foin lalais ne’e tanba ho razaun kestaun tempu ne’ebé fahe la to’o no okupadu ho servisu barak.

“Tuir deklarasaun Nilton Gusmão iha nia karta ne’e katak rejigna-aan hosi kargu Prezidente,  atu nune’e futeból bele la’o ba oin tanba iha nia lideransa agora daudaun liga seidauk bele la’o tanba okupadu ho serbisu barak,” dehan Miguel ba Agência TATOLI iha Estádiu Munisipál Dili, segunda ne’e.

Tuir estatutu, nia esplika fó dalan ba estrutura sé de’it atu rejigna-aan, inklui Prezidente Konsellu Ezekutivu hanesan mós Prezidente LFTL, Nilton Gusmão.

“Ne’e direitu sidadaun ida nian, ha’u simu karta ne’e iha loron 16 setembru foin lalais, ohi, ha’u mai iha sekretariadu ne’e para konsulta dokumentu sira ne’ebé iha, iha estatutu hatete kualker ema ne’ebé tuur iha estrutura liga nian bele rejigna-aan,” dehan Miguel ba Agência TATOLI iha Estádiu Munisipál Dili, segunda ne’e.

Iha estatutu LFTL, artigu 16, aliña rua, katak bainhira estrutura ou Prezidente liga rejigna-aan hosi sira nia kargu ema ne’ebé iha laran bele substitui automatikamente.

Nune’e, iha artigu 16, alina rua fó dalan ba Vise primeiru LFTL atu asume kna’ar hanesan Prezidente liga automatikamente durante loron 90, hodi hein prosesu asembleia jeral foun, nune’e bele hili hikas Prezidente foun.

“Ami haree hela buat sira ne’e, ha’u hanesan Prezidente Asembleia, mais ha’u ho Vise ida no Sekretariu ida ami na’in tolu sei halo reuniaun ida urjente iha kinta, semana ne’e atu haree medida sira tuir mai,” dehan Manetelu.

Dadaun ne’e, liga époka 2022-2023 seidauk bele la’o no kontinua iha esforsu entre Sekretariu Estadu Juventude no Desportu (SEJD), Federasaun Futeból Timor-Leste (FFTL) no LFTL rasik.

Liga époka 2022-2023 ne’e to’o ohin loron seidauk realiza tanba fundu ne’ebé aloka hosi Governu liu-hosi SEJD $200,000, fundu hosi FFTL mós $200,000, inklui LFTL rasik prepara $131,530 la sufisiente atu bele organiza liga époka ne’e.

Jornalista: Hortencio Sanchez

Editor        : Florencio Miranda Ximenes

iklan
iklan

Leave a Reply

iklan
error: Content is protected !!