iklan

HEADLINE, MUNISÍPIU, VIQUEQUE

Sub-KRAM Viqueque kontinua husu arte-marsiál tolu halo rejistu fatin formasaun

Sub-KRAM Viqueque kontinua husu arte-marsiál tolu halo rejistu fatin formasaun

Prezidente Sub-KRAM munisípiu Viqueque, Cosme Sarmento. Imajen Tatoli/Vitorino Lopes da Costa

VIQUEQUE, 19 setembru 2022 (TATOLI)–Prezidente Sub-Komisaun Reguladór Arte-Marsiál (KRAM) Viqueque, Cosme Sarmento, kontinua husu organizasaun arte-marsiál tolu ne’ebé eziste iha rejiaun ne’e hodi rejista fatin formasaun tanba antes ne’e halo ona reabertura maibé seidauk rejista.

“Ha’u nafatin husu ba organizasaun tolu hodi mai halo rejista fatin formasaun tanba Governu reativa ona maibé to’o agora sira seidauk mai rejista fatin organizasaun iha sub-KRAM Viqueque,” Prezidente Sub-KRAM Viqueque hateten iha ninia knaar fatin, Administrasaun munisípiu Viqueque, segunda ne’e.

Notísia relevante: KRAM Viqueque husu arte-marsiál tolu rejista fatin formasaun

Organizasaun tolu ne’e mak hanesan Ikatan Kera Sakti (IKS), Persaudaraan Setia Hati Terate (PSHT) no Kmanek Oan Rai Klaran (KORKA).

“Ami fó ona orientasaun ba responsável organizasaun hodi mai rejista fatin formasaun no sira tenke mai sub-KRAM Viqueque hodi tuir kritériu,” nia akresenta.

Tuir Cosme Sarmento, antes ne’e KORKA aprezenta ona dokumentu rejistu maibé seidauk prienxe kritériu ne’ebé estabelese.

Nune’e mós, organizasaun PSHT to’o agora seidauk aprezenta dokumentu rejistu ruma, enkuantu organizasaun IKS maka fó ona infrormasaun ba responsável sub-KRAM Viqueque maibé sira seidauk hatama dokumentu.

“Bainhira organizasaun sira halo formasaun ba membru tenke aprezenta mós dokumentu, hafoin ami halo verifikasaun hotu maka ami halo abertura sentru formasaun organizasaun. Ami prontu simu dokumentu hodi legaliza sentru formasaun sira,” nia tenik.

Organizasaun IKS ninia sentru formasaun hamutuk 47 maka eziste iha munisípiu Viqueque.

“Ami identifika ona katak entre organizasaun tolu iha munisípiu Viqueque, IKS maka iha sentru formasaun 47, ne’ebé barak liu kompara ho organizasaun rua seluk. Maibé ami haree iha balun viola tanba treinu membru sira subar-subar. Nune’e ami sei buka tuir hodi halo parasér katak ita hotu tenke kumpre lei tanba Governu iha hanoin di’ak reativa fali ona. Ho pasiénsia ne’ebé ita hotu iha, aban bain-rua imi-nia organizasaun sei la’o ho di’ak, maibé ita hakarak destroi, ita rasik maka hakarak taka organizasaun ne’ebé Governu esforsu reativa ona,” nia tenik.

Aleinde ne’e, Sub-KRAM ninia knaar sei kontinua halo monitorizasaun no kontrolu ba organizasaun arte-marsiál hotu ne’ebé eziste iha munisípiu Viqueque.

“Ami kontinua halo paresér ba líder organizasaun arte-marsiál sira no ami observa hafoin reabertura orgnizasaun tolu iha munisípiu Viqueque, ita haree númeru viólensia redús,” Prezidente Sub-KRAM Viqueque hato’o.

Kona-ba kritériu

Kritériu rejistu fatin organizasaun arte-marsiál maka hanesan tenke iha rai, treinadór no partisipante tuir formasaun mínimu 25.

Iha orientasaun segunda diretiva nian, katak fatin formasaun ida, tenke iha formadór mínimu lima, kompostu hosi koodenadór ida, asistente treinadór haat no sira tenke iha sertifikadu, bainhira laiha maka labele fó formasaun.

Obrigatóriu organizasaun sira tenke rejista hodi hetan legalidade hosi KRAM no sei halo avaliasaun hafoin organizasaun sira halo atividade ruma.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!