Vise-MEJD iha esperansa profesór graduadu baxarelatu bele hadi’a kualidade edukasaun
DILI, 19 setembru 2022 (TATOLI)—Vise-Ministru Edukasaun Juventude no Desportu (MEJD), António Guterres, iha esperansa profesór kontratadu 491 hosi munisípiu Dili, Liquiçá, Aileu no Manatuto ne’ebé simu ona graduasaun iha nível baxarelatu, bele sai profesór ne’ebé iha koñesimentu no kapasidade di’ak atubele hadi’a kualidade edukasaun iha Timor-Leste.
“Ha’u hakarak dehan de’it, esforsu hosi Ministériu Edukasaun nian konsege lori ona profesór kontratadu 2.576 hetan graduasaun hodi hasa’e koñesimentu no kapasidade atu tulun Governu bele hadi’a liután kualidade edukasaun iha Timor-Leste,” governante ne’e hateten hafoin ramata serimónia graduasaun iha salaun OKA Rudal 7984, iha Osindo, segunda ne’e.
Tuir Vise-Ministru, MEJD ninia hakarak edukasaun iha Timor-Leste bele sai kualidade, tanba ne’e maka halo esforsu hodi profesór sira hetan nível edukasaun di’ak, nune’e bele garante prosesu ensinu aprendizajen ba estudante sira iha eskola ensinu báziku sira.
“Profesór sira tenke kompleta rekezitu ne’ebé MEJD kria ona katak másimu kada profesór tenke iha grau akadémiku baxarelatu,” nia akresenta.
Notísia relevante: INFORDEPE no UNTL deside ona kalendáriu graduasaun estudante finalista 2.576
Totál dadus profesór kontratadu ne’ebé MEJD rejista hamutuk 4.902 no daudaun ne’e iha profesór kontratadu hamutuk 2.576 maka finaliza ona estudu iha nível baxarelatu.
Prosesu kooperasaun akordu entre MEJD liuhosi Instituto Nacional de Formação de Docentes e Profissionais da Educação de Timor-Leste (INFORDEPE) no Universidade Nasionál Timor-Lorosa’e (UNTL) hodi loke oportunidade ba profesór ne’ebé hanorin iha ensinu báziku sira atu hetan fatin hodi hahú estudu iha universidade, hahú iha tinan 2017 no ninia implementasaun realiza iha tinan 2018, maibé tanba mosu COVID-19 maka la konsege realiza no akordu ne’e foin hahú fali iha tinan 2021.
Enkuantu, MEJD rasik garante katak kooperasaun ne’e sei kontinua la’o nafatin ba futuru tanba sei iha tan profesór nível baxarelatu etapa daruak mak daudaun prepara ona atu estuda iha UNTL.
Iha biban hanesan, Prezidente INFORDEPE, Manuel Gomes, orgullu tanba ho esforsu ne’ebé INFORDEPE no UNTL halo konsege realiza ona graduasaun ba profesór 491 hosi munisípiu haat ba etapa dahuluk.
“Ita konsege realiza ona graduasaun faze dahuluk ba munisípiu haat, ita hein katak graduasaun tuir mai bazeia ba kalendáriu ne’ebé deside sei laiha impedimentu no fiar katak graduasaun ne’e sei realiza to’o ramata,” nia tenik.
Nune’e mós, Reitór UNTL, João Soares Martins, konsidera profesór sira iha papél importante hodi hadi’a kualidade edukasaun, tanba ne’e nia husu ba profesór kontratadu na’in-491 ne’ebé simu ona graduasaun atu nafatin fó kontribuisaun hodi apoiu Governu liuhosi garante prosesu ensinu aprendizajen di’ak liu ba estudante sira.
“Profesór sira hanesan elementu importante hodi halo edukasaun hanesan arma ida poderozu hodi bele muda sosiedade no mundu,” nia enkoraja.
Jornalista : Tomé Amado
Editora : Julia Chatarina
