iklan

DESPORTU, DILI, HEADLINE

Asembleia Jerál LFTL seidauk foti desizaun ba Nilton Gusmão

Asembleia Jerál LFTL seidauk foti desizaun ba Nilton Gusmão

Prezidente Asembleia Jerál LFTL, Miguel Manetelo. Imajen Google.

DILI, 22 setembru 2022 (TATOLI) – Asembleia Jerál Liga Futeból Timor-Leste, seidauk foti desizaun kona-bá Nilton Gusmão nia rejignasaun tanba sei rona opiniaun hosi parte hotu iha komponente futeból nian.

Prezidente Asembleia Jerál LFTL, Miguel Manetelo informa, konvoka ona enkontru maibé seidauk iha desizaun ruma ba rejignasaun Nilton Gusmão nian.

“Ami asembleia reuniaun ona maibé seidauk iha desizaun ruma, semana oin mak ita bolu órgaun liga hotu inklui Nilton Gusmão hodi enkontru tán dala ida mak foin bele foti desizaun,” dehan Manetelu iha Estádiu Munisipál Dili, kinta ne’e.

Nia dehan, prezensa Nilton nian atu rona direita nia hanoin balu kona-ba nia rejignasaun no prosesu ba oin.

Maibé atu funsionamentu liga la’o nafatin Asembleia Jerál haree ona estatutu LFTL nian maibé tenke rona mós opiniaun hotu hosi membru órgaun LFTL.

“Tenke rona opiniaun hotu ne’e, nune’e desizaun sira atu foti ba oin ne’e bele la’o ho di’ak. Loos duni iha estatutu hatete kuandu prezidente sai no la asumi ona nia knaar vise prezidente asumi kedas knaar ne’e too loron 90 mak halo fali kongresu extraordináriu hodi hili prezidente foun,” nia dehan.

Rejigna aan hosi Prezidente LFTL la’ós problema boot

Prezidente klube primeira divizaun Liga Futeból Timor – Leste (LFTL) Assalam FC, Hipolito Soares hateten, Nilton Gusmão rejigna aan hosi nia kargu hansan Prezidente la’ós problema boot ba futeból.

“La’ós problema boot Nilton rejigna aan ne’e, ita agradese nia tanba lidera liga iha tinan balu nia laran di’ak tebes. Ita mós tenke kompriende katak nia iha serbisu barak ne’ebé halo nia labele foku ba bola,” Hipolito ba Agência TATOLI iha Kampung Alor Dili, kuarta ne’e.

Nia dehan, iha rejignasaun no atividade bola buat rua ne’ebé diferente, Líder mak sai no atividade sei la taka ka paradu maibé sempre kontinua.

“Bainhira líder ida redigna-aan, la signifika atividade bola paradu tanba nia iha vise rua ne’ebé metin loos, sira na’in-rua ida bele asumi kargu prezidente temporariamente tanba estatutu LFTL mak fó dalan,” nia dehan.

Nia husu vise na’in-rua atu iha vontade hodi lidera liga tanba tuir estatutu artigu 15 no 16 iha alínea 2 ko’alia kona-ba bainhira prezidente para nia serbisu ka rejigna-aan, vise na’in-rua ida bele automatikamente asumi kargu hodi fó tempu loron 90 ba asembleia jerál konvoka reuniaun hodi rezolve problema ne’e.

“Iha loron 90 ne’e vise na’in-rua ne’e ida bele lidera kargu prezidente atu nune’e liga bele la’o normál atu fó tempu ba asembleia realiza kongresu extraordináriu hodi hili prezidente foun,” nia relata.

Daudaun ne’e, liga époka 2022-2023 seidauk bele la’o no kontinua iha esforsu entre Sekretaria Estadu Juventude no Desportu (SEJD), Federasaun Futeból Timor-Leste (FFTL) no LFTL rasik.

Liga époka 2022-2023 ne’e to’o ohin loron seidauk realiza tanba fundu ne’ebé aloka hosi Governu liuhosi SEJD $200,000, fundu hosi FFTL mós $200,000, LFTL rasik prepara $131,530 la sufisiente atu bele organiza liga époka ne’e.

Jornalista: Hortencio Sanchez

Editór: Evaristo Soares Martins

iklan
iklan

Leave a Reply

iklan
error: Content is protected !!