Jogadór selesaun nasionál seidauk simu osan tanba sei iha prosesu

DILI, 23 setembru 2022 (TATOLI) – Prezidente Federasaun Futeból Timor –Leste (FFTL) Francisco Jerónimo informa, kona-ba osan jogadór selesaun nasionál under 23 (U-23) nian seidauk halo pagamentu tanba iha hela prosesu nia laran.
“Ha’u koalia ona ho jogadór sira, kona-ba sira-nia osan sei iha hela prosesu nia laran, tanba sira- nia osan tama iha fundu ida naran fundu ba jogadór nian, entaun prosesu ami tenke halo aplikasaun no Federation International Football Asosiation (FIFA) sei halo identifikasaun ba dokumentu sira haruka ba ne’e loos ona foin halo aprovasaun, osan mai foin bele selu sira,” Prezidente FFTL informa ba Agência TATOLI, iha edifisiu, FFTL, Dili, sesta ne’e.
Ho nune’e nia husu ba jogadór hotu atu kalma pasiÉnsia hodi hein bainhira prosesu remata ona sei simu sira-nia direitu.
“Orsamentu ne’ebé iha-ne’e ba administrasaun nian, ba atividade nian, orsamentu ba jogadór sira-ne’e ba duni jogadór sira-ne’ebé ita labele kahur tún sae, tenke utiliza tuir nia dalan,” nia relata.
Total jogadór ne’ebé seidauk simu osan jogu nian hamutuk na’in-25.
Jogu ne’ebé mak jogadór sira joga ona mak hanesan kopa ASEAN Football Federation iha Kamboja tinan kotuk totál jogadór ida $500, enkuantu jogu seluk ne’ebé seidauk selu mak hanesan Sea Games Vietname 2022, jogu amigável iha Qatar, tranning camp iha Qatar, jogu kontra Nepal amigável iha Qatar, jogu amigável kontra Kamboja no jogu amigável ikus kontra Filipina iha Bali, Indonézia.
Ho nune’e totál orsamentu kada jogadór ida hetan $200-resin hosi jogu hirak ne’ebé hala’o ona.
Jornalista: Hortencio Sanchez
Editór: Evaristo Soares Martins

