MANUFAHI, 26 setembru 2022 (TATOLI)–Edifísiu Eskola Ensinu Báziku Filiál (EBF) Bee-metan, suku Betano, postu administrativu Same, munisípiu Manufahi, hosi primeiru siklu, daudaun ho kondisaun grave, tanba kondisaun eskola ho didin bebak ne’ebé iha tempu udan tahu nakonu iha sala aula laran.
Koordenadór Eskola EBF Bee-metan, Francisco Pereira, hateten, maski edukasaun munisípiu mai haree ona maibé to’o agora seidauk iha resposta, tanba ne’e parte eskola husu Ministériu Edukasaun Juventude no Desportu (MEJD) atu tau prioridade hodi hadi’a eskola, nune’e estudante sira bele estuda iha kondisaun di’ak no seguru.
“Ha’u hato’o beibeik ona, Ministériu Edukasaun iha loron 07 jullu mai haree no sukat hotu ona atu harii edifísiu foun, maibé ami hein hela to’o agora ninia rezultadu seidauk iha,” Koordenadór haktuir iha Eskola EBF Bee-metan, segunda ne’e.
Tuir Francisco, la’ós profesór sira de’it mak preokupa maibé inan aman mós hato’o preokupasaun beibeik ba Governu liuhosi enkontru sira maibé to’o agora seidauk iha resposta.
Notísia relevante: Kondisaun eskola difikulta prosesu aprendijazen estudante ESG númeru 1 Lautém
Eskola ne’e harii iha tinan 1986 no halo ona reabilitasaun iha tinan 2003, ho kalen tuan sira maka harii eskola ho didin bebak.
“Entaun tinan 19 ona, tanba ne’e uma tenke a’at no presiza halo mudansa. Kondisaun eskola ne’e agora fó impaktu ba estudante no profesór hotu, liuliu hala’o prosesu aprendizajen iha tempu udan,” nia akresenta.
Enkuantu, karteira eskolár sira ne’ebé maka distribui iha eskola sufisiente, ho totál estudante 191 no profesór neen, kompostu hosi lima permanente no ida voluntáriu, nune’e bele utiliza hela fasilidade.
Nune’e mós, Xefe suku Betano, Filipe de Araújo, rekoñese kondisaun eskola ladi’ak, tanba ne’e hanesan autoridade nia mós sempre hato’o beibeik ba parte edukasaun, maibé to’o agora seidauk hetan atensaun.
“Eskola ne’e halo ho temporáriu, tanba ne’e kuaze grave hotu ona no fó ameasa tebes ba estudante sira. Sala aula la sufisiente ona ba estudante Bee-metan atu partisipa iha prosesu ensinu aprendizajen. Ita presiza halo konstrusaun foun ba eskola atu garante prosesu ensinu aprendizajen ho di’ak no seguru ba estudante sira bainhira hala’o estudu,” nia tenik.
Aman hosi estudante, Calisto dos Reis Pires, haktuir, iha tempu bailoron di’ak maibé to’o tempu udan sempre iha problema boot tanba udan been tama iha sala aula laran.
“Ita tauk mak sala bele monu. Ami nu’udar inan aman, husu ba Koordenadór eskola atu tuur hamutuk hodi hadi’a eskola, atu nune’e bainhira udan karik labarik primeira no segundu klase bele eskola iha fatin seguru tanba agora sira eskola de’it iha tahu laran kuandu udan tuun,” nia dehan.
Calisto dos Reis nota mós katak, eskola ne’e harii kleur ona maibé to’o agora seidauk reabilita no kondisaun eskola laiha mudansa, enkuantu Governu liuhosi ministériu relevante sira mai haree ona, maibé eskola nia kondisaun mak laiha mudansa.
“Eskola ne’e bee laiha, estudante sira hatama osan $0,50 hodi sosa ba paralon dada bee mai iha eskola,” nia haktuir.
Tuir observasaun jornalista Agência Tatoli iha terrenu, nota katak eskola ne’e iha edifísiu rua, kompostu hosi sala aula lima ho fasilidade kadeira no meza maibé laiha morru.
Sala rua ba primeiru siklu taka kalen no didin ho bebak, ne’ebé ho kondisaun kuaze monu tanba ai-riin ho bebak dodook ona no kalen ferujen, enkuantu edifísiu seluk ba segundu siklu ne’e permanente iha sala aula tolu ho sala profesór ida maibé plafon balun nakloke no odamatan a’at inklui vidru janela balu laiha.
Aleinde ne’e, eskola iha de’it tanke bee ida ho nia torneira haat maibé laiha bee.
Jornalista : Tomé Amado
Editora : Julia Chatarina
