iklan

DESPORTU, DILI, HEADLINE

Tasa Nino Konis Santana la konsege finaliza, komisaun entrega osan ba SEJD

Tasa Nino Konis Santana la konsege finaliza, komisaun entrega osan ba SEJD

Konsilleiru Masimu Jogu Tasa Conis Santana, Izaldes Santana. Imajen Tatoli/Francisco Sony

DILI, 26 setembru 2022 (TATOLI) – Komisaun organizadora tasa saudozu José Conisso António Santana ‘Nino Konis Santana’, entrega hikas osan ho montante rihun $2-resin ba Sekretaria Estadu Juventude no Desportu (SEJD), tanba eventu desportiva ne’e la konsege finaliza.

Konselleiru másimu ba tasa Nino Koni Santana, Izalde Santana, haktuir, eventu ne’e hala’o iha munisípiu Lautém iha 2020 liubá la konsege konklui ho nune’e komisaun foti desizaun entrega fila-osan restu hamutuk rihun $2-resin ba SEJD no osan balun utiliza ona durante jogu la’o.

Razaun entrega osan ne’e tanba molok eventu ne’e hahú, orsamentu ne’ebé apoia hosi SEJD ho montante rihun $4.

“Jogu ne’e loloos hotu ona iha dezembru 2020 liubá, jogu ne’e la la’o ba oin tanba klube rua mak halo, jogu hotu la’o ho di’ak maibé jogu ne’e to’o ona ba finál, hasoru malu entre Klibur Lorico FC no Belta 3 FC la koopera ho di’ak, maski ami halo aprosimasaun hotu maibé klube ida Lorico lakohi joga. Ami buka meiu hotu atu rezolve dezintendimentu sira-ne’e maibé sira la koopera nafatin to’o agora, ami deside la kontinua tan jogu ne’e ona tanba osan restu ami entrega ona ba SEJD,” Izalde Santana ko’alia iha edifísiu SEJD, segunda ne’e.

Maski nune’e, nia parte husu ba SEJD atu kontinua apoia fundu kada tinan atu tasa ne’e kontinua la’o normál fali no ba oin sei la komete tán fallansu ne’e.

“Ami husu ba SEJD atu kontinua fó apoiu nafatin ami-nia tasa ne’e, tanba tasa ne’e tanba la’o harame tebes povu hotu iha Lautém,” nia relata.

Alin hosi saudozu Nino Konis Santana, husu SEJD atu apoia nafatin fundu, nune’e SEJD promete apoia nafatin eventu ne’e iha époka seluk tanba orsamentu ladún boot.

Durante ne’e klube hamutuk 60 mak rejista hodi partisipa iha kompetisaun ne’e maibé ikusmai klube rua mak ultrapasa ba finál maibé tanba dezintendimentu ho komisaun organizadora mak jogu ne’e laiha manán- na’in ba époka 2020 ne’e, maibé sei kontinua iha époka seluk.

Jornalista: Hortencio Sanchez

Editór: Evaristo Soares Martins

iklan
iklan

Leave a Reply

iklan
error: Content is protected !!