DILI, 27 setembru 2022 (TATOLI) – Prezidente klubu Boxe El-Matador Abílio Orlando dos Santos informa, durante akompaña boxista na’in-rua ba tuir eventu Australian Capital Territory Boxe iha Kamberra, Austrália hatudu prestasaun di’ak.
“Fulan kotuk ha’u lori ita-nia boxista na’in-rua, Elídio da Conceição no Delio Mouzinho, sira ba hatudu prestasaun ne’ebé di’ak tanba iha jogu primeiru iha Kamberra, Elídio manán boxista Austrália hodi hetan trofeu ida, Delio mak lakon maibé lakon ho pontu hatudu jogu di’ak,” Abílio Orlando dos Santos, informa ba Agência Tatoli, iha Benfica, Colmera, Dili, tersa ne’e.
Nia fó-sai katak, eventu daruak hala’o iha Sidney, Austrália nune’e boxista na’in-rua kontinua jogu maibé so Delio de’it mak manán hodi tuku monu boxista Austrália nian iha rin leten maibé ida-ne’e hanesan jogu amigável.
Durante hela semana rua iha Austrália atleta na’in rua ne’e hamutuk ho Prezidente El-Matador hanesan mós treinadór hetan formasaun ne’ebé di’ak iha Institute Australia Sport (IAS) fatin ne’ebé selesaun nasionál Austrália nian treina ba.
“Durante iha Austrália eventu dala-rua de’it maibé atleta na’in-rua ne’e mak hetan oportunidade di’ak tanba treinadór selesaun nasionál Austrália nian mak fó formasaun ba sira na’in-rua no ha’u mós hetan formasaun ba treinadór nian hodi aumenta tán esperiénsia,” nia relata.
Eventu ne’e, El-Matadór partisipa tanba hetan konvite direta hosi Austrália no eventu ne’e rasik inklui de’it boxista sira iha sidade Austrália laran hanesan, Darwin, Kanberra, Sidney, Malborne no seluk tán.
Atleta na’in rua ne’e hamutuk ho treinadór aranka ba iha Austrália iha loron 29 fulan-agostu no fila ona mai Timor–Leste iha 14 setembru.
Eventu ne’e Delio joga kilograma 67 to’o 71 no Elídio joga iha kilograma 51 to’o 54.
Viajen ba Austrália antes ne’e hetan rekoñesimentu hosi Federasaun Boxe Amadora Timor – Leste (FBATL) no hetan mós apoia orsamentu $1,500 hosi Sekretaria Estadu Juventude no Desportu (SEJD).
Jornalista: Hortencio Sanchez
Editór: Evaristo Soares Martins
