El-Matador preparadu partisipa TL Amateur Boxe Nasionál Championship

DILI, 27 setembru 2022 (TAT0LI) – Prezidente klube Boxe El-Matador Abílio Orlando dos Santos, fó-sai katak, klubu refere prontu no preparadu atu kompete iha eventu Boxe ne’ebé sei realiza hosi Federasaun Boxe Amadora Timor – Leste iha outubru mai ne’e.
“Ami prontu atu partisipa iha eventu ne’ebé mak federasaun hamutuk ho Governu atu realiza ne’e, ami sempre preparadu,” Abílio informa ba Agência Tatoli, iha Benfica, Colmera Dili, tersa ne’e.
Nia dehan, El-Matador sei partisipa ho atleta hamutuk na’in-neen kompostu hosi seniór na’in-tolu no juniór na’in-tolu.
Nia hatutan, El-Matador sempre prontu tanba antes ne’e El-Matador sempre kria eventu rasik no sempre partisipa mós iha eventu internasionál sira iha rai-li’ur.
“Ami prontu tanba ami mós sempre kria ami-nia eventu Boxe rasik, ami hetan suporta masimu hosi ami-nia patrosinadór CALTECH, ne’ebé ami la depende ba eventu federasaun nian maibé atividade federasaun nian iha ami prontu tuir,” nia relata.
Eventu TL Amateur Boxe Nasionál Championship sei realiza iha Jináziu, Dili hahú 01-08 outubru semana oin.
Atividade ne’e hala’o tanba hetan apoia orsamentu hosi Governu liuhosi Sekretaria Estadu Juventude no Desportu (SEJD) hamutuk $10.000.
Jornalista: Hortencio Sanchez
Editór: Evaristo Soares Martins

