DILI, 28 setembru 2022 (TATOLI) – Prezidente klubu Boxe El-Matador, Abílio Orlando dos Santos, fó-sai katak klubu sei organiza eventu internasionál Boxe nian iha Dili iha fulan-novembru.
“Planu ona novembru ami sei realiza eventu internasionál ida iha Dili, ita sei konvida boxista hosi Indonézia no Austrália atu mai partisipa hotu inklui Boxista nasionál sira,” Abilio informa ba Agência TATOLI, iha Dili foin lalais ne’e.
Nia dehan, eventu ne’e ho objetivu atu aumenta liután atleta nasionál sira-nia esperiénsia no koñesimentu iha modalidade Boxe nian nune’e iha atividade sira iha rai-li’ur boxista nasionál sira bele hatudu prestasaun ne’ebé di’ak.
Daudaun ne’e sira komesa hakbesik aan hela ba emprezáriu nasionál sira hodi sai patrosinadór hodi realiza eventu ne’e.
“Agora ami hakbesik-aan hela ba emprezáriu timoroan sira atu ajuda ami, maibé ami El-Matador iha nanis kedas ami-nia patrosinadór mak CALTECH, nia sempre iha ami-nia kotuk kualkér tempu, ne’ebé ami mós husu obrigadu barak ba CALTECH hanesan komañia timoroan ne’ebé sempre ajuda tebes ami, liuliu boxista timoroan sira,” nia dehan.
Tuir nia, fasilidade ne’ebé atu realiza eventu ne’e sufisiente no atividade hotu sei hala’o iha Jináziu Dili no sei hetan kooperasaun másimu hosi Sekretaria Estadu Juventude no Desportu (SEJD) no Federasaun Boxe Amadora Timor – Leste (FBATL).
“Tempu besik ami sei halo proposta balun hato’o ba SEJD husu apoiu osan uitoan, maibé ami kalkula ona osan ami la presiza barak, $10.000 hanesan ne’e ita bele realiza ona eventu internasionál,” nia relata.
Eventu El-Matadór nian halo dala rua ona iha tinan rua ba kotuk maibé envolve de’it atleta nasionál maibé novembru hala’o ba dala tolu sei envolve atleta internasionál.
Jornalista: Hortencio Sanchez
Editór: Evaristo Soares Martins
