iklan

NASIONÁL, DESPORTU, DILI, HEADLINE

CONTL realiza semináriu diskute jestaun desportu iha Timor-Leste

CONTL realiza semináriu diskute jestaun desportu iha Timor-Leste

Vise-prezidente CONTL, Mateus da Cruz de Carvalho. Imajen Tatoli/Rafy Belo.

DILI, 29 setembru 2022 (TATOLI) – Vise-Prezidente Komité Olímpiku Nasionál Timor-Leste (CONTL- sigla portugés), Mateus da Cruz informa, kinta ne’e reprezentante hosi Universidade Públiku Surabaya esplika lala’ok jestaun modalidade desportu hotu iha Timor-Leste.

“Semináriu ne’e ita hala’o durante loron ida konvida sira hosi Indonézia, universidade negeri Surabaya atu ko’alia kona-ba manajementu (jestaun) desportu ba modalidade desportu hotu, atu loke koñesimentu federasaun hotu  nian,” Mateus da Cruz ko’alia iha Sentru Kulturál Indonézia nian iha Dili, kinta ne’e.

Nia dehan, dalabarak federasaun desportu sira iha esperiénsia barak maibé koñesimentu kona-ba desportu, liuliu jestaun laiha.

“Nune’e mak ita konvida sira mai atu fó netik kona-ba saida mak jestaun desportu no siénsia desportu oinsá, tanba evolusaun ne’e la’o iha mudansa barak,” nia relata.

CONTL iha ona planu ba futuru atu lori hikas reprezentante universidade públiku Surabaya mai Timor-Leste ho ekipa ne’ebé boot atu fahe esperiénsia kle’an ba federasaun desportu hotu iha Timor-Leste.

Alende ne’e CONTL ko’alia ona ho Sekretaria Estadu Juventude no Desportu (SEJD) oinsá haree halo kooperasaun ida ho universidade públiku Surabaya atu nune’e fó bolsa estudu ba timoroan sira-ne’ebé hakarak ba estuda desportu iha Indonézia, liuliu iha universidade ne’ebé mensiona.

Jornalista   : Hortencio Sanchez

Editór         : Evaristo Soares Martins

iklan
iklan

Leave a Reply

iklan
error: Content is protected !!