Eis Konsul Jerál bá Sidney halo keixa hasoru Ministra Adaljiza Magno

DILI, 04 outubru 2022 (TATOLI)-Eis-Kosul Jerál Timor-Leste bá Sidney Austrália, Luciano Valentim da Conceição, akompaña hosi nia-Defesór hosi Defensoria Públiku, Sergio Quintas, tersa ne’e, halo keixa ba Tribunál Distritál Dili (TDD), hasoru atúal Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno, tanba durante fulan-lima iha tinan 2021 la transfere osan operasionál ba konta bankária Konsul Jerál Sidney nian.
Hafoin hato’o keixa ba TDD, Eis Konsul Jerál bá Sidney ne’e informa ba Jornalista sira katak, razaun halo keixa hasoru Ministra Adaljiza Magno tanba iha fulan marsu 2021, halo deklarasaun públiku katak Governu transfere osan ba konta bankária Konsul Jerál-nia, maibé konta bankária mak blokeiadu ka muda ona.

“Deklarasaun hosi Ministra Adaljiza Magno, iha fulan-marsu 2021, ne’ebé hateten katak Governu liuhosi MNEK transfere osan ba konta bankária konsul jerál iha Sidney Austrália. Maibé, iha prosesu transferénsia osan la tama tanba dehan konta bankária, ha’u mak halo blokeia ka halo mudansa,” hateten Luciano.
Nune’e, halo keixa ho bazia ba artigu 417 iha Kódigu Prosesu Sivíl, katak ema ne’ebé ho dolo, ka intensaun, tanba prátika faktu sira ilisitu ruma ne’ebé mak fó prejuizu bá ema seluk, nia iha obrigasaun, atu tenke selu indemnizasaun ba ema ne’ebé mak sofre indemnizasaun.
“Señora Ministra nia deklasaun ne’e la’ós estraga ha’u nia integridade pesoál nu’udar Xefe Misaun, maibé hamo’e mós naran Timor-Leste iha rai li’ur partikulamente iha rai Austrália,” katak.
Tanba, nia dehan tuir regra universál hosi nasaun hotu katak Embaixadór ka Konsul Jerál laiha direitu no kompeténsia hodi ruma muda ka altera nota bankária Estadu nian.
“Ita iha lei própriu só Ministeriu Finansas maka iha direitu ba loke no halo aterasaun ba nota bankária. Nune’e Ministra nia deklarasaun iha televizaun no mídia sira la loos no laiha faktus,” nia lamenta.
Iha biban hanesan, Defeza hosi Defesór Públiku, Sergio Quintas, hateten nia parte akompaña nia kliente hato’o kiexa iha TDD hasoru atuál Ministra Adaljiza Magno, ba kazu ba krime asaun deklarativa de indemnizasaun pur faktu ilísitu iha artigu 417 iha Kódigu Prosesu Sivíl.
“Ohin, ita rejista keixa ida iha tribunál hasoru Señora Adaljiza Magno, bazeia ba deklasaun hosi atuál Minsitra katak Eis Kosul Timor-Leste bá Sidney maka troka konta bankária, maibé laiha verdade hosi deklarasaun ne’e,” nia afirma.
Defeza Eis Konsul Jerál ne’e, konsidera ho deklasaun ne’e hamosu buat prejuizu la patrimoniál no danu la ho materiál ne’ebé daudaun asistidu sofre hela.
“Tribunál maka iha kompeténsia tomak defere no indefere ba prosesu sira ne’e. Ha’u fiar katak, iha tempu badak tribunál bele sita no bolu ona parte kontrariu atu responde,” nia afirma.
Jornalista Agência TATOLI tenta kofirma asuntu ne’e bá Ministra Adaljiza Magno, maibé daudaun iha hela nasaun Japaun hodi tuir seremónia funebre eis Primeiru Ministru Japaun, Shinzo Abe, no sei fila hikas mai Timor-Leste iha loron 10 outubru 2022.
Jornalista: Natalino Costa
Editór : Florencio Miranda Ximenes

