iklan

DESPORTU, DILI, HEADLINE

CDTL realiza semináriu hodi mellora jestaun desportiva iha Timor-Leste

CDTL realiza semináriu hodi mellora jestaun desportiva iha Timor-Leste

Prezidente CDTL, Macario Sanches. Imajen/ Media CDTL

DILI, 05 outubru 2022 (TATOLI)— Konfederasaun Desportiva Timor-Leste (CDTL-sigla Portugés), hamutuk ho federasaun desportiva hotu, kuarta ne’e, realiza semináriu hodi  hasa’e koiñesimentu no abilidade lideransa federasaun nian hodi mellora jestaun desportiva iha Timor-Leste.

“Ami realiza semináriu ida ne’e hamutuk ho lideransa federasaun sira hotu atu mellora liután sira nia koiñesimentu, hodi atu hatene di’ak liután regra sira iha desportu no halo jestaun ne’ebé di’ak iha sira nia federasaun ida-idak hodi mellora desportu di’ak liután iha Timor-Leste,” hateten Prezidente Konfederasaun Desportiva Timor-Leste (CDTL-sigla Portugés), Macario Sanches,iha Fundasaun Oriente Lecidere-Dili, kuarta ne’e.

Alende ne’e, semináriu ne’e bele ajuda mós federasaun sira hodibele organiza didi’ak sira nia atleta, nune’e bele hasa’e prestasaun di’ak iha eventu sira nasionál no internasionál.

Semináriu ne’e realiza tanba CDTL serbisu hamutuk ho Sekretáriu Estadu Juventude no Desportu (SEJD).

“Semináriu ne’e ho tema, dezenvolvimentu desportu sai kritériu ba prestasaun atu nune’e ita nia atleta sira bele iha hanoin no atitude di’ak  ba prestasaun iha naaun ne’e,” katak nia.

CDTL mós hakarak atividade desportu hotu-hotu tenke organiza hamutuk ho Governu, nune’e organizasaun sira bele la’o ho dalan ida de’it hodi bele evita organizasaun sira la’o mesak tuir hakarak hodi nunka lori Timor-Leste ba hatudu prestasaun di’ak iha área desportiva.

Iha fatin hanesan, Sekretáriu Jerál Interenu Federasaun Boxe Amadora Timor-Leste (FBATL), Domingos Malitety, hateten formasaun jestaun ne’e ba sira lideransa federasaun desportu hanesan buat foun ba sira.

“Hanoin atividade kona-ba formasaun jestaun ida ne’e ba ami buat foun ida hahú hosi Timor – Leste ukun aan to’o agora foin mak hetan entaun ida ne’e buat di’ak ba ita atu implementa iha federasaun ida-idak,” nia agradese.

Iha ambitu ne’e, SEJD no Est Timor Development Agency (ETDA) mak sai hanesan oradór prinsipál.

Nune’e SEJD reprezenta hosi Diretora Nasionál Alta Kompetisaun Maria Luisa Monteiro ne’ebé  esplika kona-ba lei baze desportu ba federasaun desportu sira atu komprende didi’ak.

Entretantu, lei baze desportu ho diploma ministerial númeru. 40/2020 ne’ebé esplika bainhira federasaun ou organizasaun sira  atu asesu ba utilidade públiku tenke prinxe rekezitu hanesan tenke iha edifisiu própriu, estatutu ne’ebé klaru no legaliza hosi Ministériu Justisa no seluk tan.

Enkuantu ETDA nian reprezenta hosi Jerente Januario Moc, hodi fó esplikasaun kona-ba oinsá mak federasaun sira bele halo jestaun di’ak ba sira nia federasaun.

Semináriu ne’e partisipa direta hosi Federasaun ne’ebé ejiste iha Timor-Leste hamutuk 35.

Jornalista: Hortencio Sanchez

Editór           : Florencio Miranda Ximenes

iklan
iklan

Leave a Reply

iklan
error: Content is protected !!