Top

Kazu ilísitu droga, TR seidauk foti desizaun rekursu MP kona-ba arguidu na’in-sia

Prezidente Tribunal Rekursu, Deolindo dos Santos. Imajen Tatoli/Antonio Goncalves.

DILI, 05 outubru 2022 (TATOLI)— Tribunál Rekursu (TR), seidauk foti desizaun kona-ba rekursu ka pedidu hosi Ministériu Públiku (MP) atu hala’o fiskalizasaun ba desizaun Tribunál Distritál Dili (TDD), ne’ebé antes ne’e aplika medida koasaun Termu Identidade Rezidénsia (TIR) no Aprezentasaun Periódika ba arguidu nain-sia, ne’ebé deskonfia envolve kazu tráfiku no llísitu ba droga.

“Hanesan Juis no mós Prezidente Tribunál Rekursu, ha’u labele ko’alia buat ne’ebé mak sei iha hela rekursu nia laran, tanba ha’u mak sei foti desizaun ikus ba ida ne’e, tanba ne’e lei la permite ha’u atu pronúnsia buat balun hosi ida ne’e,” Prezidente Tribunál Rekursu (PTR), Deolindo dos Santos, hateten ba jornalista sira hafoin audénsia ho komisaun A Parlamentu Nasionál, kuarta ne’e.

Notísia relevante:  MP prepara rekursu kontra desizaun TDD ba kazu tráfiku no Ilísitu ba droga

MP submete rekursu tanba konsidera desizaun tribunál primeira instánsia liuhosi Tribunál Distritál Díli (TDD) aplika medida koasaun Termu Identidade Rezidénsia (TIR) no Aprezentasaun Periódika ba arguidu na’in-sia ladun koresponde ho aktu krime ne’ebé arguidu sira komete.

Nune’e, MP husu atu altera desizaun primeira instánsia hodi aplika medida koasaun prizaun preventiva b aba arguidu na’in ho inisiál DGA, MM, B, MAA, AY, SSO, M, CRM, no J.

Prezidente TR afirma rekursu hosi Ministériu Públiku nian ne’e, Tribunál Rekursu sei notifika parte ne’ebé rekerre rekursu mai Tribunál no parte defeza sira hosi arguidu sira.

“Sira sei aprezenta sira nia kontestasaun sira hodi remete mai Tribunál Rekursu. Ikus mai tuir prosesuál, Tribunál Rekursu sei haree no analiza, no ikus liu maka Tribunál Rekursu foti desizaun,”katak nia.

Tanba ne’e, Deolindo dos Santos afirma seidauk garante bainhira loos mak atu Tribunál Rekursu foti desizaun ba Rekursu Ministériu Públiku nia relasiona kazu droga ne’ebé envolve hosi arguidu nain-sia.

“Klaru que ha’u seidauk hateten ba ita bo’ot sira  desizaun oinsá, metan ka mutin, ha’u seidauk bele pronunsia buat balun ba ida ne’e, tanba prosesu sei la’o hela,” nia afirma.

Entretantu, Tribunál Distritál Dili (TDD), liuhosi Juis singulár José Gonçalves deside aplika medida koasaun Termu Identidade Rezidénsia (TIR) no aprezentasaun periódika ba arguidu na’in-sia, ne’ebé deskonfia envolve iha kazu ilísitu ba droga.

Razaun, TDD aplika TIR tanba konsidera laiha faktu sufisiente atu lori arguidu sira ba prizaun preventiva, tanba arguidu sira sai vítima ba konsumu de’it, maibé la’ós distributór.

Maske, iha prosesu alegasaun Ministériu Públiku husu Tribunál atu aplika prizaun preventiva ba arguidu sira tanba konsidera iha indísiu forte katak arguidu sira komete prátika konsumu no transaksaun ba droga.

Tuir nian lei númeru 2/2017, 25 janeiru, kona-ba kombate tráfiku no konsumu ilísitu ba droga. iha artigu 7 kona-ba tráfiku no atividade ilísita no artigu 9 kona-ba agravasaun utilizasun droga fó vantajen bá arguidu sira katak, hafoin medida koasaun ne’e, iha faze investigasaun nia laran mak sei iha klareza arguidu sira iha ligasaun ho sé de’it.

Notísia relevante:  Laiha faktu sufisiente,TDD aplika TIR ba arguidu nain-sia ba kazu ilísitu droga

Jornalista: Natalino Costa

Editór       : Florencio Miranda Ximenes

Publisidade

Leave a Reply

Latest Post

error: Content is protected !!