VIQUEQUE, 06 outubru 2022 (TATOLI)–Servisu Rejistu no Verifikasaun Emprezariál, Institutu Públiku (SERVE, I.P) sukursál munisípiu Viqueque, rekola taxa $704 durante fulan-rua, agostu to’o setembru.
“Taxa sira ne’e ami rekolla hosi empreza sira ne’ebé mai halo renovasaun,” Koordenadora SERVE, I.P Celestina da Conceição Soares, hateten ba Agência Tatoli, iha ninia knaar fatin, iha ninia knaar fatin, tersa ne’e.
SERVE, I.P Viqueque iha fulan-agostu rejista foun Enin hamutuk 41 no Unipessoal ualu, renovasaun Enin 19, Unipessoal 12 no alterasaun Enin rua no Unipessoal hitu. nune’e taxa rekolla taxa hamutuk $292, enkuantu iha fulan-setembru rejista foun Enin 21 no Unipessoal rua, renovasaun Enin tolu no Unipessoal neen no alterasaun Enin laiha no Unipessoal ida, rekolla taxa hamutuk $412.
“Daudaun ne’e ami aplika rejista móvel ka halo atendementu direta ba negosiante sira iha baze. Tanba durante ne’e negosiante kiik sira hanesan loke kioske sira la hatene servisu SERVE, I.P nian. Entaun ami hakbesik-an hodi explika knaar no sira sente kontente,” nia akresenta.
Notísia relevante: SERVE Oé-Cusse hatama reseita rihun $6-resin iha kofre Estadu
SERVE, I.P ninia servisu maka rejista negosiante sira-nia atividade iha Timor-Leste, bainhira sidadaun ida loke negósiu tenke halo rejista iha SERVE, I.P hodi hetan legalidade.
“Karik ita-nia negosiante sira la rejista konsidera ilegál. Tanba ne’e, ha’u nafatin husu ba komunidade hodi mai rejistu ita-boot sira-nia atividade negósiu,” nia sujere.
Rejista atividade negósiu foun gratuita bainhira halo renovasaun maka selu $10 to’o $20, depende ba volume atividade negósiu nian.
“Ami bá postu Lacluta hodi halo atividade rejistu móvel ka rejistu direta negosiante sira, ne’ebé konsege rejista kioske 24 no ba postu Uatucarbau rejista 10. Tanba negosiante sira laiha dokumentu Billete Identidade, nune’e sira husu ajuda ba ami hodi ba fó hatene rejistu notariadu hodi prodús negosiante atu sira bele rejista. Ba negosiante sira ne’ebé laiha Billete Identidade ha’u hato’o ona ba rejistu notariadu Viqueque tanba komunidade presiza dokumentu ne’e hodi trata dokumentu lisensa negósiu,” nia dehan.
Kona-ba atendimentu ba rejista negosiante sira kada loron SERVE, I.P fó atendimentu ba ema na’in-10 ba leten.
Funsionáriu SERVE, I.P ne’ebé daudaun ne’e serbisu iha munisípiu Viqueque hamutuk na’in-12.
Jornalista : Vitorino Lopes da Costa
Editora : Julia Chatarina
