iklan

EKONOMIA, HEADLINE, MUNISÍPIU, OÉ-CUSSE (RAEOA)

SERVE Oé-Cusse hatama reseita rihun $6-resin iha kofre Estadu

SERVE Oé-Cusse hatama reseita rihun $6-resin iha kofre Estadu

Koordenadór SERVE,IP sukursál Oè-Cusse, Reinaldo António Mendonça. Imajen Tatoli/ Abílio Elo Nini.

OÉ-CUSSE, 04 outubru 2022 (TATOLI) – Hahú hosi fulan-janeiru to’o setembru tinan 2022, Servisu Rejistrasaun no Verifikasaun Emprezariál, Institutu Públiku (SERVE,IP) sukursál Rejiaun Administrativa Espesiál Oé-Cusse Ambeno (RAEOA), hatama reseita $6,890,45, ba kofre Estadu liuhohosi atividade rejistrasaun komersiál.

Koordenadór SERVE, IP, sukursál RAEOA, Reinaldo António Mendonça, informa, hosi montante taxa ne’e, SERVE,IP rekolla liuhosi atividade komersiál hahú hosi janeiru to’o setembru tinan ne’e.

“Rezultadu reseita liuhosi períodu atividade rejista komersiál iha SERVE sukursál Oé-Cusse, hahú hosi primeiru trimstre to’o terseiru trimestre 2022, iha konsege rekolla taxa ba kofre Estadu hamutuk $6,890,45,” Reinaldo Antonio Mendonça, informa ba jornalista sira iha Oé-Cusse, tersa ne’e.

Nia afirma, taxa ne’e kobre hahú hosi fulan jeneiru to’o setembru, ida-ne’e maioria rekolla hosi atividade sira-ne’ebé maka empreza no ema-ne’ebé hala’o atividade ekonomia, balu ba área konstrusaun no nesesidade bázika, otél no restaurante sira.

Tuir nia haree, iha empreza balu halo rejistu foun iha SERVE sukursál Oé-Cusse, maibé iha regulamentu tuir lei rejistu komersiál nian, ne’ebé SERVE iha katak, empreza sira mai rejistu foun laiha taxa.

Maibé bainhira dokumentu lisensa mate atu extende tan ka renova fila-fali hodi aumenta atividade atu konkore iha projetu ruma , entaun lei hatete tenke kontribui taxa ba kofre Estadu.

Koordenadór ne’e la esplika detalla kona-bá totál empreza rejistu iha SERVE sukursál Oé-Cusse, maibé desde Governu destaka SERVE.IP, iha Oé-Cusse iha 2018 komunidade barak iha inisiativa hakarak rejistu foun ka loke lisensa ba atividade negósiu.

“Dezde SERVE mai ita simu empreza hanesan enin, unip pesoál lda no SA hamutuk 219 ne’e iha 2018, iha tinan 2019 SERVE konsege rejistu foun 119, iha 2020 rejistu foun 99, no iha tinan 2021 hosi janeiru-juñu rejistu foun hamutuk 101, no totál hamutuk hosi 2018 to’o juñu 2021 SERVE sukursál Oé-Cusse simu rejistu foun hamutuk 538,” nia katak.

Notísia relevante: SERVE sukursál RAEOA hatama $2,464.15 ba kofre Estadu

Jornalista: Abílio Elo Nini
Editór: Evaristo Soares Martins

iklan
iklan

Leave a Reply

iklan
error: Content is protected !!