Graduadu tenke hatudu étika profisionál iha prosesu ensinu aprendizajen
OÉ-CUSSE, 07 outubru 2022 (TATOLI) – Prezidente Autoridade RAEOA Arsénio Paixão Bano, apela ba graduante sira na’in-182 ne’ebé simu ona graduasaun hosi Universidade Timor-Lorosa’e atu hakaas-aan hodi hatudu karáter ho étika profisionál no kualifikadu iha prosesu ensinu aprendizajén diária.
Tuir autoridade ne’e katak, profesór hanesan líder ida atu transforma matenek ba oan sira-nia futuru, tán ne’e nia husu hatudu progresu tuir kultura akadémika nian iha ambiente idak-idak hodi garante kualidade edukasaun iha Timor-Leste.
“Ha’u esperu ohin profesór 182 ne’e, sei hatudu rezultadu di’ak, tanba solusaun ba futuru ba rai ida-ne’e maka edukasaun, ohin ne’e inísiu atu halo di’ak liután iha eskola sira, hanorin oan-sira di’ak liután hatudu ezemplu di’ak, hatudu étika profisionál, títulu ida-ne’e simu, presiza hatudu diferente, tenke hatudu karáter hanesan ema kualifikadu iha prosesu aprendizajén,” Arsénio Paixão Bano, ko’alia iha ámbitu serimónia graduasaun hala’o iha otél Ambeno, Oé-Cusse, sesta ne’e.
“RAEOA ohin kontente tebes, ha’u hanoin loron ne’e espesiál ba edukasaun iha tempu hotu-hotu tanba ne’e primeira vez graduasaun ida UNTL realiza ba profesór 182 iha Oé-Cusse ba nível edukasuan grau baxarelatu nian, ha’u kontente tanba entre 182 ne’e feto maioria,” nia orgullu.
Nia dehan, ne’e signifika edukasaun iha RAEOA bele iha kuadru ne’ebé di’ak atu hanorin estudante sira tanba Oé-Cusse iha estudante rihun-25 iha territóriu Oé-Cusse.
“Ha’u hanoin ho prezensa profesór baxarelatu na’in-182 bele hatudu diferente iha planu polítika atu dudu oan sira sai matenek, ha’u hein katak tinan oin ita sei aumenta tán profesór sira seluk atu kontinua sira-nia formasaun iha área espesialidade kona-bá profesór nian,” nia katak.
Notísia relevante: MESSK husu profesór sira asegura edukasaun ho kualidade
Jornalista: Abílio Elo Nini
Editór: Evaristo Soares Martins
