Korea Súl apoia TL konstrui kampu futeból haat iha kapitál Dili

DILI, 07 outubru 2022 (TATOLI)– Governu Korea Súl apoia Governu Timor -Leste hodi konstrui kampu futeból haat hanesan kampo Kulau,Becora, Kampu Bintang, Bidau, Kampu Kampung Alor no Kampu Comoro ho orsamentu milliaun $2.4-resin.
Biban ne’e, Ministru Edukasaun Juventude no Desportu (SEJD), Armindo Maia hato’o apresiasaun no agradese ba povu no Governu Korea Súl ho laran luak tulun povu Timor – Leste hodi konstrui kampo futeból haat.

“Ami kontente tanba foin dahuluk, nasaun Korea Súl ajuda ami liuhosi konstrusaun kampo futeból haat ne’e, maibé iha kampo futeból Becora ne’e hamutuk kampu rua, ne’ebé kompleta ho fasilidade hanesan dormitóriu ba jogadór sira no seluk tan,” dehan Ministru Armindo Maia, bainhira lansa fatuk dahuluk iha Becora Dili.
Iha fatin hanesan, Sekretáriu Estadu Juventude no Desportu (SEJD), Abrão Saldanha reforsa konstrusaun ba kampu futeból haat ne’e mak hanesan, kampo Kulau Becora, Kampu Bintang Bidau, Kampu Kampung Alor no Kampu Comoro.
“Kampo haat ne’e halo pakote ida de’it ho totál osan hosi KOICA hamutuk miliaun $2.4 resin,” dehan Abrão.
Iha oportunidade ne’e, Embaxadór Korea Súl iha Timor – Leste, Kim Jeong Ho relata apoiu ne’e Governu Korea Súl liuhosi KOICA hakarak ajuda Timor-Leste liuliu ba labarik ki’ikoan sira hodi bele prátika desportu.
“Ne’e apoiu hosi Korea Súl ba Timor-Leste tanba hakarak dezenvolve desportu iha nasaun ne’e. ami hakarak Timor – Leste nia labarik sira bele iha abilidade di’ak ba desportu,” katak.

Nasaun Korea Súl nia apoiu ba Timor-Leste hahú kedan iha 2002 to’o mai ohin loron no hakarak kontinua tulun Timor – Leste iha área oin-oin.
Projetu ne’e sei konstrui hosi kompaña Timoroan ho naran CHLN Timor Unipesoal Lda tanba durante KOICA loke konkursu kompaña refere mak sai hanesan vensedór hodi konstroi kampo haat ne’e ho durasaun kontratu fulan-18 tenke intrega ona ba Governu Timor – Leste.
Entretantu, Diretór Kompaña Joselino Alves afirma, sira nia parte garante sei ka’er obra ne’e ho responsabilidade no finaliza tuir kontratu ne’ebé iha.
“Ami garante sei finaliza obra ne’e, tanba obra ne’e sei la’o ho orden tuir espesifikasaun dezeñu ne’ebé orienta hosi KOICA, konstrusaun ami hahú ona semana kotuk, maibé ohin ne’e hanesan lansa de’it fatuk dahuluk ba kampu futeból haat ne’e hotu,” nia kompromete.
Hafoin fó fiar ba kompña lokál ne’e KOICA mós ho nia sistema kontrolu rigorozu no kompañia tenke implementa tuir tempu ne’ebé termina, se la termina mak kompañia hetan penalidede hodi selu fali osan ba KOICA.
“Sistema KOICA nian rigorozu hanesan presaun ida mai ami para servisu di’ak hodi finaliza lalais obra ne’e ho kualidade,” nia afirma.
Konstrusaun ne’e sei envolve traballadór timoroan hamutuk 150 to’o 170 no kada kampu ho enjeneiru no arkitetu mesak timoroan.
Alende ne’e, iha kampo haat ne’e iha kampo balun hanesan Kampung Alor no Comoro komunidade balun sei okupa, maibé Governu sei halo mediasaun hela ho komunidade sira nune’e tempu besik kompaña halo konstrusaun.
Povu agradese Korea Súl
Komunidade Suku Ailok, postu administrativu Cristo-Rei, munisipiu Dili, Francisco Martins sente kontente no husu agradese ba Governu Korea Súl liu hosi Agência KOICA hamutuk ho Governu Timor – Leste bele kria ona kampo di’ak id aba sira maski foin hahú konstrusaun.

“Ami sente kontente tanba kampo ne’e aban bairua ami nia oan no timoroan hotu mak sei uza, ne’ebé ami koopera tebes atu konstrui kampo ne’e, dala ida tan agradese ba Governu Korea Súl,” agardese.
Entretantu, Xefe Suku Ailok Mario do Rego hateten, nia komunidade sira koopera tebes hodi hala’o konstrusaun kampu futeból refere.
“Ami autoridade lokál sempre ko’alia ho komunidade sira, ita tenke simu dezenvolvimentu tama iha ita nia suku, ne’ebé komunidade sira ami hotu koopera tebes, tanba harii kampu ne’e di’ak ba ita nia oan sira,” dehan Xefe Suku ne’e.
Nia dehan, nia parte sei servisu hamutuk ho Xefe Aldeia sira no Ofisial Polisiamentu Suku (OPS) no komunidade hotu atu tau seguransa masimu ba projetu ne’e to’o finaliza konstrusaun.
“Ami mak sei sei seguransa ba konstrusaun ne’e, hamutuk ho Xefe Aldeia sira, OPS no komunidade sira atu kompaña halo obra ne’e bele lao ho susesu,” nia relata.
Antes ne’e, komunidade uma-kain hamutuk lima mak hela besik kampu ne’e, maibé uma-kain hirak ne’e koopera tebes ho autoridade lokál sira hodi muda sai hosi fatin ne’e.
“Durante ne’e uma-kain lima mak okupa kampu ne’e nia ninin, maibé bainhira atu hahú konstrusaun ami mai ko’alia sira koopera tebes no sira muda sai ona,” nia relata.
Tanba ne’e kampu ne’e kompañia livre halo konstrusaun no laiha inpedimentu ruma hosi komunidade no seluk tan.
Jornalista: Hortencio Sanchez
Editór : Florencio Miranda Ximenes

