DILI, 07 outubru 2022 (TATOLI)— Sekretariu Estadu Juventude no Desportu (SEJD), Abrão Saldanha informa konstrusaun kampu multifunsaun Taibessi, munisípiu Dili tarde tebes no to’o agora seidauk finaliza tanba problema iha alterasaun ba dezeñu.
“Ami halo ona notifikasaun dala-rua ona ba sira, maibé sira agora book-an halo servisu ona, se sira la halo servisu mak medida seluk sei foti ba sira hapara no fó ba ema seluk ka’er, problema ne’e mak alterasaun ba dezeñu no halo verifikasaun ba mai hosi Agência Dezenvolvimentu Nasionál (ADN) ne’e mak lori tempu kle’ur uitoan,” hateten SEJD Abrão iha Becora, sesta ne’e.
Maske, nia dehan kulpa hodi halo tarde projetu ne’e la’ós kompaña nian de’it, maibé iha mós administrasaun SEJD nian hotu bainhira halo dezeñu ne’e.
“Problema seluk mak kompañia manán projetu seluk fali, entaun sira nia kapitál ne’ebé oferese mai atu halo kampo ne’e, sira hein SEJD lori tempu naruk halo verifikasaun kle’ur uitoan, entaun sira utiliza tiha sira nia osan ne’e ba halo projetu seluk ida ne’e mak kle’ur to’o agora,” nia esplika.
Antes ne’e, SEJD halo ona pagamentu 20% ba kompaña tanba tuir kontratu tenke halo pagamentu 20% uluk hafoin halo servisu.
Ho nune’e, daudaun SEJD simu informasaun hosi tékniku sira konstrusaun liu ona 20%.
“Sira halo liu ona saida mak ita pagamentu ba sira, fiar katak ba oin sira sei finaliza obra ne’e, ita pagamentu ba sira 20%, maibé agora sira halo liu ona 20%, se sira la finaliza mak ita sei hapara sira fó ba kompaña seluk hodi halo hotu,” katak.
Konstrusaun ba kampo ne’e SEJD lansa fatuk da-uluk iha loron 22 outubru tinan kotuk no agora kompleta ona tinan ida seidauk finaliza, tanba tuir kontratu sei finaliza iha abríl 2022, maibé la konsege.
Ho nune’e Governu liu hosi SEJD kontinua hanaruk tan kontartu fulan neen tan atu bele konklui projetu ne’e.
Konstrusaun kampu multifunsaun ho objetivu atu joven-sira bele espresa talentu no prátika desportu hanesan futeból, basketból no voleiból.
Projetu ne’e ezekuta hosi kompañia Uka Unipesoál Lda, ho orsamentu $24.000-resin no durasaun fulan-neen.
Jornalista: Hortencio Sanchez
Editór : Florencio Miranda Ximenes
