Prezidente Auroridade RAEOA fiskaliza projetu dormitóriu Ambeno iha Dili
DILI, 10 outubru 2022 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, segunda ne’e halo fiskalizasaun ba konstrusaun projetu dormitóriu Ambeno iha Comoro, munisípiu Dili, ne’ebé serbisu hala’o durante semana tolu ho progresu atinje 10%.
Konstrusaun dormitóriu ne’e, ezekuta hosi empreza Bobolait, Unipesoál Lda, ho valór kontratu $278,969.71, ne’ebé Autoridade RAEOA aloka hosi Orsamentu Jerál Estadu (OJE) 2021 nian.
“Ohin ita mai haree progresu ne’e la’o oinsá, tanba ita lansa iha setembru, agora obra ne’e la’o semana tolu ona, entaun ohin ha’u konfirma parte tékniku no ita haree kontrusaun la’o hela nia progresu agora 10%, ne’ebé ita garante sei finaliza iha dezembru tinan ne’e,” Arsénio Paixão Bano, informa hafoin hala’o fiskalizasaun.
Nia informa, estudante sira-ne’ebé hela iha dormitóriu Ambeno hodi hala’o sira-nia estudu iha kapitál Dili hamutuk na’in-58, feto 17 no mane 41.
Nune’e molok kontrusaun ne’e hahú autoridade RAEOA buka solusaun hodi muda provizória estudante sira hela iha Dom Bosco, Comoro, bainhira obra ne’e remata hodi hela. Tanba daudaun ne’e empreza hahú halo konstrusaun foun ba dormitóriu ne’e, no tuir kontratu konstrusaun ne’e ezekuta durante fulan lima ne’ebé sei remata iha dezembru tinan ne’e.
“Ita mai fiskaliza no mós enkoraja empreza, presiza aselera obra ne’e tuir dokumentu kontratu ne’ebé autoridade propoin ona, atu nune’e estuante sira bele hela ona iha tinan oin, tanba fatin ne’e importante ba estudante sira hosi Oé-Cusse mai hala’o estudu iha kapitál Dili.
Notísia relevante: PA RAEOA hatuur fatuk dahuluk ba konstrusaun dormitóriu Ambeno iha Dili
Jornalista: Abílio Elo Nini
Editór: Evaristo Soares Martins
