Kazu ilísitu droga, TDD fó konfiansa ba PCIC no SNI hakle’an investigasaun
DILI, 10 outubru 2022 (TATOLI)— Tribunál Distritál Dili (TDD), kontinua fó konfiansa Polísia Sientífika Investigasaun Kriminál (PCIC, sigla portugés) no Servisu Nasionál Investigasaun (SNI) hodi ezekuta mandadu buksa domisiliáriu no apreensaun ba arguidu na’in-sia ne’ebé envolve kazu ilístu droga.
Bazeia ba mandadu ne’e, iha loron segunda (10/10), PCIC hamutuk ho Servisu Nasionál Intelijénsia (SNI) halo mandadu buska domisiliáriu no apreensaun ba arguidu na’in-lima hanesan MM, SSO, M, AY ho J nia rezidénsia atu rekolla tán evidénsia balun hodi bele nesesita ba Ministériu Públiku nian investigasaun ba kazu ne’e.
Notísia relevante: Laiha faktu sufisiente, TDD aplika TIR ba arguidu nain-sia ba kazu ilísitu droga
“Kona-ba mandadu husi Tribunál, baibain ne’e pedidu husi Ministériu Públiku atu halo kompletu nia investigasaun ka hakle’an tán prosesu investigasaun Ministériu Públiku nia ba kazu ne’e,” Juiz Administradór Tribunál Distritál Dili, Afonso Carmona informa ba jornalista sira iha TDD Colmera, Tersa ohin.
Mandadu buska domisiliáriu no apreensaun ne’e katak TDD fó orden ba PCIC atu bá iha fatin ne’ebé arguidu sira hela ba no deskonfia karik iha tan sasan balun iha uma-laran, nune’e bele rekolla hodi kompleta investigasaun.
Tibunál hasai mandadu ne’e laiha relasaun ho rekursu hosi Ministériu Públiku, maibé mandadu ne’e atu fó kompeténsia ba PCIC atu bele tama to’o arguidu sira-nia uma laran, hodi halo revista ba sasán sira ne’ebé iha uma-laran.
“Karik durante períodu arguidu sira livre hela ne’e, keta sira mós halo tán atividade ruma hanesan antes ne’e sira halo karik. Nune’e, polisia bele deskobre kedan iha situasaun sira hanesan ne’e, hodi nesesita ba investigasaun Ministériu Públiku nian,” katak
Entretantu, Ministériu Públiku (MP) submete ona rekursu ba Tribunál Rekursu hodi kontra desizaun Tribunál Distritál Dili (TDD)-nian kona-ba kazu ilísitu ba droga ne’ebé aplika medida koasaun Termu Indetidade Rezidénsia (TIR) no aprezentasaun periódika ba arguidu na’in-sia.
Tribunál Distritál Dili (TDD) liuhosi juiz José Gonçalves aplika medida koasaun Termu Identidade Rezidénsia (TIR) no aprezentasaun periódika ba arguidu na’in-sia ho inisiál DGS, MM, B, MAA, AY, SSO, M, CRMS no J tanba konsidera faktu la sufisiente.
Maske, iha alegasaun interrogatóriu dahuluk, MP husu akuza arguidu sira ho krime tráfiku no atividade ilísita ne’ebé previstu iha artigu 7 (tráfiku no atividade ilísita) lei númeru 02/2017, 25 janeiru. Maibé, Tribunál Distritál Dili aplika TIR no aprezentasaun periódika.
Nune’e, MP la aseita hodi hato’o rekursu ba Tribunál Rekursu atu anula medida koasaun TIR no aprezentasaun periódika ba fali médida koasaun prizaun preventiva
Kazu ilísitu droga, TR seidauk foti desizaun rekursu MP kona-ba arguidu na’in-sia
Jornalista: Natalino Costa
Editór : Florencio Miranda Ximenes
