Guarda Floresta Sentrál rekolla $14.439,50 hosi infrasaun fa’an ai ilegál
DILI, 12 outubru 2022 (TATOLI)—Guarda Floresta Sentrál rekolla koima hosi ema halo infrasaun fa’an ai ilegál, ne’ebé presta deklarasaun no selu koima ba banku hamutuk $14.439,50, hahú janeiru to’o setembru 2022.
“Ita hetan reseita hosi fa’an ilegál ai-sunu $9.383,85 no ai-konstrusaun $5.055,65,” Xefe Departamentu Korpu Guarda Floresta Sentrál, João dos Reis, informa ba Agência Tatoli, iha ninia knaar fatin, Colmera, kuarta ne’e.
Orsamentu $14.439,50 ne’ebé rekolla kompostu hosi janeiru $2.085,50, fevereiru $1.038,25, marsu, $537, abril, $375,10, maiu $1.011,15, juñu $131,50, jullu $473,50, agostu $1.263,25, no setembru $1.299,35.
“Ema sira ne’ebé kontinua halo atividade ilegál hanesan ai-sunu no ai-konstrusaun selu koima depende ba iha volume ai, ezemplu karreta grand max tula nakonu iha stapel metru tolu, selu $75, ba karreta baskulante tula stapel metru neen selu $150, maibé nia trata dokumentu iha karta lisensa kada stapel metru selu $6,” nia esplika.
Notísia relevante: Autoridade suku hahú monitoriza ai-kameli iha Venilale
Nia dehan, ema sira ne’ebé sempre kontinua fa’an ai-sunu no ai-konstrusaun ne’e maihosi munisípiu Ermera, Liquiçá, Aileu no Dili parte Hera nian.
“Ko’alia kona-ba bandu ema halo kasa ilegál ba animál fuik sira, ta’a ai-sunu, ai-kameli no ai-konstrusaun, iha ita-nia lei ne’ebé bandu maibé komunidade mak menus konsiénsia hodi kontinua halo atividade ilegál,” nia tenik.
Jornalista : Arminda Fonseca
Editora : Julia Chatarina
