iklan

BAUCAU, EKONOMIA, HEADLINE, MUNISÍPIU, SEGURANSA

Autoridade suku hahú monitoriza ai-kameli iha Venilale

Autoridade suku hahú monitoriza ai-kameli iha Venilale

Xefe suku Uailaha, postu administrativu Venilale, munisípiu Baucau, Rafael Guterres. Imajen Tatoli /Natalino Belo.

BAUCAU, 28 juñu 2022 (TATOLI) – Autoridade suku iha postu administrativu Venilale, munisípiu Baucau, hahú monitoriza ai-kameli iha suku Uailaha tanba iha grupu balun ‘na’ok’ ai-kameli iha tempu kalan.     

Xefe suku Uailaha, Rafael Guterres, esplika kazu na’ok ai-kameli besik hún atus-ida ne’ebé ema na’ok ne’e akontese iha tempu kalan durante fulan-rua resin.

Kazu ne’e seidauk keixa ba autoridade seguransa tanba seidauk iha evidénsia forte maibé autoridade suku sei kontinua halibur dadus no informasaun hafoin keixa ba parte seguransa.

“Ai-kameli ne’e besik hún atus-rua, tanba fatin balun ami seidauk tama, ami mós komesa halo ona kontrolu ba fatin ai-kameli ne’ebé ema la konsege foti (na’ok),” Xefe suku Uailaha hateten iha Vila Nova, tersa ne’e.

“Ha’u kontinua rekolla informasaun no halibur dadus ba ai-kameli ne’ebé ema deskoñesidu na’ok molok relata ba autoridade seguransa no administradór postu administrativu Venilale hodi halo prosesu investigasaun kle’an nune’e identifika autór prinsipál,” nia hateten.

Xefe suku Uailaha sei koordena ho autoridade suku Uato-Haco atu hamutuk tún ba baze fahe informasaun ba populasaun oinsá tau matan ba rekursu naturál ai-kameli iha área refere.

Diresaun Jerál Floresta, Kafé no Planta Industriál iha Ministériu Agrikultura no Peska maka sai nu’udar responsável ai-kameli, ai-horis ne’ebé sai hanesan emblema nasionál tanba iha valór ekonómiku ne’ebé aas.

Nune’e iha fulan-novembru tinan 2015, Konsellu-Ministrus aprova rezolusaun ida-ne’ebé promove atividade kuda ai-kameli nian sira, atu nune’e bele regula ninia esplorasaun.

Ai-horis ida-ne’e iha utilidade oinoin, hanesan ekolójika, istórika, ekonómika, kulturál, terapéutika, ornamentál no to’o relijioza. Tanba haree buat hirak-ne’e mak iha polítika protesaun ambiente nian, ai-kameli sai nu’udar produsaun prioritária ida.

Iha 21 fevereiru 2017, Konsellu Ministrus hili loron 13 fulan-janeiru nu’udar Loron Nasionál  Ai-kameli no Floresta nian, ho objetivu atu fó atensaun liu ba kna’ar sentrál floresta nian iha manutensaun ba ambiente ida-ne’ebé saudável, iha konservasaun diversidade balada no ai-horis sira nian, no iha dezenvolvimentu ekonómika.

Loron Nasionál Ai-kameli no Floresta nian la tama ba-iha lista Feriadu Nasionál nian no la-tama mós iha data ofisiál sira-ne’ebé komemorativa ho direitu ba feriadu.

Jornalista   : Natalino Belo

Editór         : Evaristo Soares Martins

iklan
iklan

Leave a Reply

iklan
error: Content is protected !!