DILI, 15 outobru 2022 (TATOLI)-Tribunál Distritál Dili (TDD), sábadu ne’e interroga Ona arguidu GPdS no MfC ne’ebé deskonfia envolve iha kazu Set-Top Box.
Arguidu na’in-rua ne’e to’o mai iha Tribunál Distritál Dili (TDD) iha oras tuku 9:00 dadeer akompaña hosi ekipa Komisaun Anti Korrupsaun (CAC, sigla portugés).
Hafoin to’o tiha TDD, arguidu na’in-rua ne’e deskansa kuaze oras ida iha sela TDD nian molok submete ba interrogatóriu dahuluk ne’e.
Perante interrogatóriu dahuluk iha sala julgamentu TDD nian, Mininisteriu Públiku (MP) ne’ebé reprezenta hosi Prokuradór Matias Soares imputa krime lima (5) ba arguidu na’in-rua.
Krime lima ne’ebé MP imputa arguidu na’in-rua maka hanesan abuzu podér, brankeamentu kapitál, prevista iha fraude fiskál, partisipasaun iha ekonomia iha negósiu no konflitu interese ne’ebé previstu iha Kódigu Penál Timor-Leste nian.
Enkuantu prosesu interrogatóriu dahuluk ne’e, Tribunál adia ba parte lokraik hodi kontinua rona deklarasaun arguidu na’in-rua nian.
Entretantu arguidu na’in-rua, GPdS no MfC ekipa konjunta lidera hosi CAC, halo detensaun, apreensaun no buska domisiliáriu tanba deskonfia suspeitu na’in-rua ne’e envolve kazu projetu instalasaun Set-Top Box.
Supeitu GPSD nu’udar asesór iha Ministériu ba Asuntu Parlamentár no Komunikasaun Sosiál (MAPKOMS) iha área Planu, Programa no Forsa Traballu. No suspeita MFC nudar na’in ba kompañia Dili Eternal Inovation ne’ebé kontrata hanesan manán-nain ba projetu intalasaun Set-Top Box.
Ekipa konjunta ezekuta mandadu hosi tribunál NUC 0016/2021 CACTL hodi halo detensaun, apreensaun no buska buska domisiliáriu ba suspeitu na’in-rua.
Suspetu GPdS ekipa konjunta halo detesaun iha Gabinete Ministru Asuntu Parlamentu (MAPKOMS), Francisco Jerónimo iha oras dadeer 9:30 no suspeitu MfC iha nia uma Tuana Laran aras 10:30.
Iha prosesu detensaun, apreensaun no buska domisiliáriu iha suspeita MFC nian rezidénsia ho oras tolu nia laran, ekipa konjunta halo apreensaun ba dokumentu balun no asegura karreta privadu ida-ne’ebé suspeita uza loron loron.
Enkuantu iha biban hanesan ekipa konjunta mós halo apreensaun no buska domisiliariu iha suspeita GDS nian rezidénsia iha Liquiçá. Durante apreensaun no buska domisiliáriu iha suspeitu nia rezidensia ekipa konjunta foti evidénsia hanesan dokumentu hodi nesesita ba prosesu investigasaun.
Suspeitu GPdS no MfC daudaun ne’e ekipa konjuta lori mai hodi detein ona iha sela CAC nian hodi kumpri oras 72 molok submete ona ba interogatoriu dauluk iha Tribunál Distritál Dili (TDD).
Enkuantu interrogatoriu dahuluk ne’e prezide hosi Juiza Albertina Neves, Ministériu Públiku reprezenta Prokuradór Matias Soares no arguidu sira hetan asisténsia hosi Advogadu Privadu Arlinodo Sanches no Advogada na’in-rua-rua.
Jornalista: Natalino Costa
Editór: Evaristo Soares Martins
