MS-OMS hala’o marsa saudável selebra loron mundiál saúde mentál
DILI, 15 outubru 2022 (TATOLI)—Ministériu Saúde, hamutuk ho Organizasaun Mundiál Saúde, (OMS) hala’o marsa saudável walk he talk hodi selebra loron mundiál saúde mentál, ne’ebé la’o-ain hosi Sentru Konvensaun Dili (CCD) to’o BJ Habibie, Bidau Santana ho tema “hamosu saúde mental no moris di’ak ba ema hotu sai prioridade globál”.
“Ami hamutuk ho Organizasaun Mundiál Saúde selebra loron mundiál saúde mentál ne’ebé la’o-ain hosi Sentru Konvensaun Dili, to’o BJ baibie hodi lori moris di’ak ba ita-nia família, komunidade, liuliu hamosu hanoin ba mundu tomak, oinsá garante ema hotu ba moris di’ak ba saúde mentál nian,” Vise Ministru Saúde Bonifacio Maucoli dos Reis informa ba jornalista sira iha BJ Habibie, Bidau Santana, ohin.
Nia dehan, ema ho moras mentál daudaun ne’e haree númeru aumenta barak, entaun MS mós liuhosi Diresaun Saúde ba Familia oinsá pesoál saúde sira ba direitamente uma-kain idak-idak hodi identifika halo diagnóstiku partisipatóriu atubele rezolve problema sira.
“Liuliu oinsá atu haree kauza hosi moras ne’e mai hosi fatór saida, ekonomia ka sosiál ka fator seluk entaun hosi ida-ne’e mak ita bele rezolve, tanba Governu kria fasilidade saúde, liuliu iha Hospital Nasionál Guido Valadares (HNGV) ba sira-ne’ebé mak grave, ida-ne’e halo tratamentu ba sira nune’e ita mós hamutuk ho parseiru São João de Deus lori ba Laklubar hodi bele halo tratamentu kontinuasaun,” nia dehan.
Bonifacio Maucoli esklarese, moras mentál ema hotu nia kontribuisaun, liuliu família sira, no mós autoridade lokal inklui estadu atu garante ema hotu nia saúde mesmu mentál maibé oinsá tau atensaun ba sira.
Iha fatin hanesan, Reprezentante Organizasaun Mundiál Saúde iha Timor Leste, Arvind Mathur informa ema ho moras mentál labele halo diskriminisaun no estigamasaun maibé lori sira ba faslidade saúde halo tratamentu.
Nune’e Ekipa Líder ba Saúde Mentál hosi PRADET, Nicolau Vicente Ximenes informa husi tinan 2002 to’o 2021 fó ona atendimentu ba pasiente mentál hamutuk 1.678.
“Hosi prosesu rekuperasaun sira-nee iha dalan-ninin ne’ebé ami akumula hamutuk 21 ne’ebé mak hetan tratamentu no fila ona ba família nomós atividade reabilitasaun hosi tinan 2013 to’o agora pasiente hamutuk 28 mak ami reintegra ba família entaun serbisu ida,-ne’e mak ami halo no fó atendimentu ba sira ,” Nicolau Vicente Ximenes esplika.
Jornalista : Felicidade Ximenes
Editór: Evaristo Soares Martins
