Top

Komisáriu CAC: MAPKOMS Francisco Jeronimo seidauk sai suspeitu ba kazu Set-Top Box

Ekipa Comissão Anti Corupção (CAC), hala'o identifikasaun ba Ministru Asuntu Parlamentár no Komunikasaun Sosiál, Francisco Martins da Costa Jerónimo, liga ho kazu intalasaun set -top box RTTL.EP, iha sala investigasaun CAC Faról Dili, segunda (17/10). Imajen Tatoli/Francisco Sony

DILI, 17 outubru 2022(TATOLI)—Komisáriu Komisaun Anti Korrupsaun (CAC, sigla Portugés), Sergio Hornai, hateten iha prosesu  ezekusaun mandadu Tribunál Distritál Dil (TDD), hodi halo buska domisiliáriu no apreensaun ba Gabinete Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, iha Palásiu Governu,  Federasaun Futeból Timor Leste (FFTL) ho nia rezidénsia iha Liquiça, hodi rekolla objetu no dokumentu balun relasiona ho kazu instalasaun Set-Top Box RTTL,E.P.

“MAPKOMS Francisco Jeronimo-nian estatutu sei hanesan Ministru, seidauk sai hanesan supeitu tanba sei iha hela prosesu indetifikasaun, analiza no halo investigasaun ba dokumentu hirak ne’ebé mak parte CAC halo apreensaun hosi MAPKOMS Francisco Jeronimo”, Komisáriu CAC ne’e hateten ba Jornalista sira iha edifísiu CAC-Faról, segunda ne’e.

Notísia relevante: TDD aplika Aprezentasaun Periódika no Proíbisaun Aujénsia ba arguidu kazu instalasaun Set-Top Box

Komisáriu CAC, Sérgio de Jesus Costa Hornai. Imajen TATOLI/Francisco Sony

Durante prosesu buska no apreensaun, CAC rekolla evidénsia balun hanesan laptop iMac ida no dokumentu komprovativu balun atu hakle’an prosesu investigasaun tanba prosesu ba kazu projetu instalasaun set-Top box seidauk iha nia finalidade.

Iha prosesu analiza objetu no dokumentu, Komisáriu CAC ne’e, esplika bainhira deteta buat ruma ka iha evidénsia mak CAC remeta ba Ministériu Públiku hodi husu promove estatutu MAPKOMS nian ba suspeitu, maibé durante iha prosesu analiza dokumentu mak CAC la deteta buat ruma nia (MAPKOMS) bele livre.

“CAC halo hela investigasaun mak iha provabilidade rua de’it, hanesan se iha evidénsia entaun posibilidade bele sai suspeita, se laiha nia tenke livre. Maibé ita laiha prazu tanba depende ba iha rezultadu investigasaun KAK nian ba dokumentu sira ne’e,” katak nia.

Tanba, Sergio Hornai afirma prezensa MAPKOMS Francisco Jeronimo nian iha KAK atu submete de’it ba prosesu investigasaun relasiona ho kazu projetu instalasaun Set-Top Box ne’ebé deskonfia envolve hosi nia-asesór ho inisiál GPsD no empreza na’in mak MfC.

“Durante prosesu interrogatóriu dahuluk, arguidu nain-rua temi mós MAPKOMS Francisco Jeronimo, katak deskonfia mós envolve iha kazu set-Top Box ne’e.  Tanba ne’e Tribunál liuhosi Juiz ne’ebé preside kazu ne’e, efetua mandadu apreensaun no buska domisiliariu ba MAPKOMS Francisco Jeronimo atu halo apreensaun no buska ba iha objetu no dokumentu balun ne’ebé maka ligasaun ho kazu Set-Top Box,” nia esplika.

Ekipa CAC hatuun dokumentu hosi karreta hafoin halo buska no apreensaun ba dokumentu hosi Ministru Asuntu Parlamentár no Komunikasaun Sosiál, Francisco Martins da Costa Jerónimo, liga ho kasu intalasaun set -top box RTTL.EP, iha resintu CAC Faról Dili, segunda (17/10). Imajen Tatoli/Francisco

Iha artigu 53 hosi lei kódigu penál ne’e hateten, bainhira orgaun polisia kriminál sira atu halo identifikasaun ba ema ida tenk haree iha nesesáriu, bele halo identifikasaun iha fatin ruma ou mai iha sede ka eskuadra polisia ninian no bele mai iha KAK atu halo identifikasaun pesoál ida.

Entretantu, Tribunál Distritál Dili (TDD), domingu (16/10), liuhosi Juisa Albertina Neves, deside aplika medida koasaun Aprezentasaun Periódika no Proíbisaun Aujénsia ba arguidu GPdD no MfC ne’ebé deskonfia envolve iha kazu Set-Top Box.

Tribunál aplika medida koasaun Aprezentasaun Periódika ba arguidu GPdS, ne’ebé nu’udar asesór iha Ministériu Asuntu Parlamentar no Komunikasaun (MAPKOMS) no aplika medida koasaun Proíbisaun Aujénsia ba arguida MfC.

“Tibunál aplika desizaun ba ha’u nia kliente nain-rua, hanesan kliente insiál GPdS, ho aplikasaun Aprezentasaun Periódika (AP), atu kada semana rua aprezenta aan iha Eskuadra Polísia ne’ebé besik, no arguida MfC, mak tribunál aplika Proíbisaun Aujénsia, hodi bandu nia labele sai hosi territóriu nasionál.  Tanba kazu ne’e sei la’o hela no seidauk termina”, hateten Advogadu Privadu, Arlindo Sanches.

Nune’e, nia dehan ho desizaun ne’e nia parte aseita no konsidera desizaun ne’e adekuadu ba nia kliente.

Hatan kona-ba sasan hanesan karreta ne’ebé antes ne’e ekipa CAC halo apreensaun iha árguida MfC, nia dehan, hanesan parte Defeza ba arguidu nain rua nian husu ba tribunál atu devolve fila fali sasan ne’ebé maka antes ne’e ekipa CAC halo apreensaun iha árguida MfC nia rezidénsia tanba sasan sira ne’e laiha relasaun ba kazu ne’ebé arguida envolve.

Maske, antes ne’e Ministériu Públiku (MP) ne’ebé maka reprezenta hosi Matias Soares husu ba tribunál atu aplika medida koasaun prizaun preventiva, ba arguidu na’in-rua, tanba haree ba faktu no prova sira, komprova duni katak arguidu na’in-rua maka nu’udar autór ne’ebé envolve direta ba kazu ne’e.

Ho nune’e, haree ba razaun hirak-ne’e maka Ministériu Públiku husu ba tribunál atu aplika medida koasaun prizaun preventiva tanba atu asegura arguidu sira labele halo lakon faktu no prova sira, bazea ba artigu 183 hosi Kódigu Penál Timor-Leste nian.

Razaun seluk ne’ebé maka MP fundamenta iha alegasaun ne’e maka atubele asegura arguidu sira labele desvia hosi prosesu justisa, tanba kazu ne’e seidauk iha finalidade.

Notísia relevante: Notísia relevante: Kazu Set-Top Box, arguidu na’in-rua submete interrogatóriu dahuluk

Jornalista: Natalino Costa

Editór      : Florencio Miranda Ximenes

Publisidade

Leave a Reply

Latest Post

error: Content is protected !!