Top

MNEK-TIC Timor selebra akordu kooperasaun iha área teknolojia

Ekipa TIC kontinua instala aplikasaun sistema serbisu Governu Eletrónika ba liña ministeriál. Imajen espesiál

DILI, 17 outubru 2022 (TATOLI) – Ministériu Negósiu Estranjeiru no Kooperasaun (MNEK) hamutuk ho Agência Teknolojia Informasaun no Komuniksaun (TIC) Timor Institutu Públiku, segunda ne’e, selebra akordu kooperasaun nivél servisu ba lansamentu sistema baze ba dadus kona-ba arquivu eletróniku.

“Ohin, asina akordu kooperasaun nivel serbisu, entre MNEK ho TIC kona-ba baze dadus rekursu umanu, infraestrutura durante halo kooperasaun, liuliu TIC hadi’a domain, hadi’a email no seluk tan. Kona-ba website seidauk bele asina tanba kestaun tékniku no preparasaun ne’ebé foin atinje 70%,” hateten Sekretáriu Jerál MNEK, Embaixadór Francisco Tilman Cepeda, ba jornalista sira iha edifísiu MNEK,Prai-Kokeirus-Dili.

Akordu ne’e, TIC-Timor sei konstrui sistema baze dadus iha MNEK ho dijitál modern no la’ós ona manuál.

Nune’e, Sekretáriadu Jerál MNEK ne’e afirma ho dijitalizasaun ne’e hafasil tebes atu identifika kargu diplomata no nia background-sira ho nivél edukasaun atu destaka ba rai li’ur no laran.

Iha biban hanesan, Diretór Ezekutivu Interinu TIC-Timor, Andre Felix Marques, hateten kooperasaun ne’e atu instituisaun rua ne’e bele servisu hamutuk iha área teknolojia nian.

“Kooperasaun ne’ebé ita hala’o atu parte rua bele servisu hamutuk iha área teknolojia nian, nune’e bele asegura baze dadus instituisaun nian, tanba dala barak ita nia dadus importante sira tau de’it iha internet, nune’e fasil ba ema seluk atu tama.  Maibé agora ita rasik mak fó seguransa ba ita nia dokumentu importante sira no ema nasaun seluk sei la asesu”, katak .

Daudaun ne’e, instituisaun Estadu hamutuk 55 mak asina akordu ho TIC inklui Munisipiu 12. Enkuantu Rejiaun Administrativu Espesiál Oé-Cusse Ambeno (RAEOA) no munisípiu espesiál Ataúro, mak seidauk asina akordu ruma, maibé iha tempu besik sei asina mós akordu servisu.

TIC nia servisu loloos mak atu apoiu ba Governu eletróniku hodi asegura dadus Governu nian, tanba antes ne’e dadus Governu nian rai de’it iha fatin barak iha rai li’ur.

“Ami agora iha sentru dadus ne’ebé adekuadu hodi rai dadus Governu nian hotu. Ita iha sistema seguransa ne’ebé iha atu hatene ema atu mai halo hacker ba sistema sira ne’e,” akresenta.

TIC nia servisu ba teknolojia rai dadus hosi instituisaun ba instituisaun la presiza internet, maibé utiliza de’it koneksaun lokál no bainhira atu manda dadus sai ba rai-liur, mak foin uza rede ínternet.

“Ita la presiza internet, bainhira atu asesu ba website Governu sira nian la presiza internet ami halo koneksaun lokal tantu hosi Munisipiu mai Dili,” nia esplika.

Jornalista: Hortencio Sanchez

Editór        : Florencio Miranda Ximenes

Publisidade

Leave a Reply

Latest Post

error: Content is protected !!