Top

La kumpre regulamentu, treinadór elemina kapitaun U-20 hosi selesaun nasionál seniór

Kapitaun Under 20 (U-20), Cristovão Moniz Fernandez “Eta” (hatais faru mean). Imajen/espesiál.

DILI, 18 outubru 2022 (TATOLI) – Treinadór prinsipál selesaun nasionál senior, Gopal krishnan A.S. Ramash hateten foti desizaun hodi elemina jogadór hanesan mós kapitaun Under 20 (U-20) Cristovão Moniz Fernandez (Eta) hosi selesaun nasionál senior tanba kontra regulamentu jogu nian.

“Ami foti desizaun hodi hasai jogadór Eta hosi selesaun seniór tanba kontra regulamentu beibeik ona. Regulamentu mak ne’e o mai tama iha selesaun atu defende nasaun, la’ós defende grupu ou individu, bandu dehan jogadór selesaun kampu boot labele joga iha futsal, maibé jogadór ne’e la kumpre nia ba joga iha futsal sira iha Dili laran”, dehan Gopal ba Agência TATOLI iha edifisiu Federasaun Futeból Timor – Leste tersa ne’e.

Nia dehan, durante ne’e fó konfiansa tebes ba jogadór ne’e, maibé tanba nia hahalok no lakohi obdese ba regulamentu hakarak lakohi tenke hasai, atu nune’e jogadór seluk labele halo tuir saida mak nia halo.

“Nia komete erru ida primeiru ne’e nia mai ko’alia hakraik aan mai ami no promete sei la halo tan, maibé ikus nia komete nafatin ida ne’e ita labele tolera,” nia relata.

Elemina ona hosi selesaun, jogadór ne’e laiha ona direitu absoluta hodi hamutuk ho nia kolega sira ba partisipa iha kualifikasaun kopa Asian Football Federation (AFF) Mitsubishi ne’ebé Timor-Leste sei kontra Brunei Darusalam iha novembru mai ne’e.

Iha sorin seluk, Jagadór Cristovão Moniz Fernandez (Eta), rekoñese nia-aan sala no kontra duni regulamentu jogu nian.

“Tanba, ha’u ba joga fali iha futsal mak treinadór sira hasai ha’u, loos duni ha’u mak sala”, nia afirma.

Maski sai hosi selesaun nasionál, maibé ba nia sente baibain hanesan esperiénsia ida, atu nune’e labele komete tan iha futuru.

Ho nune’e, jogadór ho númeru kamizola 23 ne’e promete, oportunidade seluk mak treinadór sira boku fali nia hodi reforsa selesaun nia prontu atu kontribui nafatin.

Daudaun ne’e prosesu treinamentu kontinua la’o di’ak no jogadór hamutuk na’in 24 mak preparadu hodi bá partisipa iha jogu ne’ebé sei akontese fulan oin.

Jornalista: Hortencio Sachez

Editór      : Florencio Miranda Ximenes

Publisidade

Leave a Reply

Latest Post

error: Content is protected !!