DILI, 19 outubru 2022 (TATOLI)— Polisia Nasionál Timor-Leste (PNTL) liuhosi Servisu Nasionál Intelijénsia, halo detensaun ba suspeitu na’in-lima ne’ebé foti subar motór iha kapitál Dili.
Hafoin Servisu Informasaun Polisia Nasionál (SIPN), simu informasaun hosi komunidade, nune’e orienta kedas ekiipa buska ne’ebé lidera hosi SIPN ho SNI Makikit Munisipiu Dili junta ho Eskuadra Vera-Cruz buka tuir autór sira ba krime públiku no konsege asegura joven na’in-lima ne’ebé envolve iha kazu foti subar motór no telefone iha área Jardím 12 Novembru Suku Motael, postu administrativu Vera-Cruz, munisípiu Dili.
“Ekipa servisu rekolla uluk informasaun no lansa vizilánsia iha oras tuku 12:20, kalan hodi detein suspeitu sira iha fatin ne’ebé la hanesan”, refere nota ne’ebé Agência TATOLI asesu, kuarta ne’e.
Tanba Ekipa servisu sekreta detein uluk suspeitu balun iha área suku Motael , maka suspeitu ABS ne’ebé foin sai hosi prizaun iha 2021, ho nia maluk feto ida naran EXGA idade 17.
Tuir mai kaptura mós suspeitu DGFS (tinan 17), nu’udar estudante iha eskola Palaka hamutuk ho suspeitu RX idade 22 no sira na’in rua ekipa detein iha área merkadu Taibesi. Hafoin detein tan suspeitu ATDC (tinan 15), iha área Gan 45, Hudi-Laran, suku Bairru-Pite.
Iha prosesu identifikasaun suspeitu sira koopera di’ak no sira deklara katak motór balun ne’ebé sira foti iha area Bairo Grilhos, Sentru Saude Formoza no área Taibesi.
Evidénsia motór hirak ne’e maka hanesan Honda Beat kór mutin, xapa mátrikula I.6286,Honda Beat street kór metan, xapa mátrikula M.3502 no Honda Beat kór metan kahur mean, xapa mátrikula Q.7712.
Hafoin remata prosesu identifikasaun ekipa eskuadra PNTL Vera-Cruz entrega hikas alin feto EXGA (17) ba nia familia iha Lurumata, inklui ATDC enkuantu suspeitu nain-3 seluk halo kedas auto entrega ba Servisu Investigasaun Kriminál Nasionál (SIKN) hodi asegura iha Komandu PNTL Munisípiu Dili hodi halo detensaun durante oras 72 no sei kontinua primeiru interrogatóriu iha tribunál.
Jornalista: Hortencio Sanchez
Editór : Florencio Miranda Ximenes
