Ministru Armindo promete valoriza funsionáriu 70 ne’ebé apoiu servisu impresaun PEN

DILI, 20 outubru 2022 (TATOLI)–Ministru Edukasaun Juventude no Desportu (MEJD), Armindo Maia, promete sei fó valorizasaun ba funsionáriu 70 ne’ebé durante loron 40, hosi tuku 08:00 to’o 21:00 halo ona servisu impresaun ba Pontu Ezame Nasionál (PEN).

Ministru Armindo Maia hateten, relatóriu hosi Gabinete avaliasaun kurríkulu nasionál kona ba oras hira no loron hira maka sira investe ona iha sentru impresaun ne’e hodi prepara halo impresaun pontu ezame nasionál sira ne’e.

“Ha’u sei la haluha. Ministériu mós sei valoriza funsionáriu sira nia servisu, tanba funsionáriu no profesór sira mós iha sistema kréditu point ba servisu ne’ebé sira halo ona. Tanba ne’e maka ha’u hein lista atu ita bele prosede hodi valoriza servisu ne’ebé maka boot sira halo ona”, Armindo Maia hateten ba jornalista sira iha serimónia distribuisaun pontu ezame nasionál ba diretór munisípiu sira iha sentru impresaun Komoro, kinta ne’e.

Armindo hatutan, maske surat pedasuk ida ho ninia folin kala 50 sentavus de’it, maibé ninia pontuasaun ne’e maka importante tebes. Hanesan instituisaun ida tenke valoriza buat ne’ebé maka ninia funsionáriu sira halo ona.

Nia haktuir ezame nasionál ne’e sai mós indikadór ida ba dezempeñu MEJD nian, ita sei haree rezultadu ezame nasionál sei hatudu oinsá sei sai sasukat ka indikadór ida konaba ita ninia dezempeñu. “Tanba ne’e maka ha’u hakarak husu ita hotu nia responsabilidade tomak hahú hosi prosesu elaborasaun pontu mai to’o impresaun no prosesu sira tomak no agora prosesu tan atu entrega ba munisípiu sira depois ba eskola sira”.

Tanba ne’e, nia dehan ezije sentidu responsabilidade ba nivel hotu, nune’e rezultadu finál hosi ezame nasionál ne’e refleta duni estudante sira-nia kapasidade.

“Ha’u hakarak aproveita oportunidade ne’e agradese ba hotu-hotu ne’ebé kontribui ona ezame nasionál, hahú hosi ekipa elaborasaun pontu, supervizaun no prosesu sira seluk sei hakat ba faze tuir mai iha eskola sira”, tenik nia.

Diretór Avaliasaun Dezenvolvimentu Kurrikulár MEJD, Mateus dos Reis, hatutan atividade impresaun ho pakote no verifikasaun ba dokumentu hotu ona, ne’ebé hala’o durante loron 40 nia-laran hahú hosi tuku 08:00-21:00 kalan, envolve funsionáriu hamutuk 70.

Sira ne’ebé maka hala’o servisu, enunsiadu ba disiplina hotu iha ezame nasionál inklui relijiaun no moral katólika, fixa resposta ba disiplina hotu iha ezame nasionál ho baze komputadór no ba relijiaun no morál katólika uza fixa baibain inklui termu abertura lista prezensa no lista verifikadór.

Hosi prosesu impresaun pontu ezame nasionál ne’e rasik gabinete avaliasaun, antes ne’e simu totál dadus ezaminadu hamutuk 59,172 depois kuandu halo fila fali verifikasaun finál hetan de’it ezaminadu hamutuk na’in 57,751. Menus hosi 1421 hosi dadus inisiál.

Totál 57,751, kompostu hosi ensinu báziku terseiru siklu hamutuk 30.887 inklui feto 15.680 no mane 15.207. Ensinu sekundáriu jerál totál estudante 22.525 kompostu feto 11.985 no mane 10.540, estudante tékniku vokasionál 4.339, kompostu feto 1.880 no mane 2.459. Totál sentru ezame hamutuk 484 fahe ba ensinu báziku terseiru siklu iha sentru 308, ensinu sekundáriu jerál iha sentru 114 no ensinu sekundáriu tékniku vokasionál iha sentru hamutuk 62.

Notísia relevante: MEJD sei anunsia rezultadu ezame nasionál iha fulan-janeiru nia laran

Jornalista       : Tomé Amado

Editora           : Rita Almeida