OÉ-CUSSE, 21 outubru 2022 (TATOLI) – Autoridade Rejiaun Administrativa Espesiál Oé-Cusse Ambeno (RAEOA) sei haruka xefe suku no jestór sira ba halo estudu komapativu iha Nusa Tenggara Timur (NTT) iha fulan-novembru ne’e.
Adjuntu Prezidente Autoridade Rejiaun Administrativa Espesiál Oé-Cusse Ambeno (RAEOA) ba Asuntu Sosiál, Maximiano Neno, informa, planu atu dezloka autoridade komunitáriu komposta hosi jestór sub-rejiaun sira no xefe suku 18 sei akontese iha loron 07 to’o 10 novembru tinan ne’e, ho objetivu atu haforsa implementasaun Programa Suku Amasat iha Oé-Cusse Ambeno.
Adjuntu Prezidente Autoridade RAEOA ne’e informa, ekipa ne’e sei kompsota hosi jestór sub-rejiaun na’in-haat, Oésilo, Pássabe, Nítibe no Pante Makasar, no xefe suku na’in-20 inklui xefe aldei na’in-rua hanesan kandidatu suku foun, suku Kutete no Monemeko.
Dezlokasaun ne’e sei lidera hosi Sekretáriu Rejionál Asuntu Administrasaun, Martinho Abani Elo, no Adjuntu Prezidente Autoridade RAEOA ba Asuntu Sosiál, Maximiano Neno, hamutuk responsável Programa Suku Amasat hosi Unidade Promosaun no Komérsiu.
Nune’e fatin atu realiza estudu komparativu ne’e iha fatin rua primeiru iha distritu Timur Tenggah Utara (TTU) no distritu Timur Tengah Selatan (TTS), pertense ba provínsia Nusa Tenggara Timur (NTT).
“Prosesu preparasaun ita halo ona dezde fulan kotuk, iha ona serteza ba orsamentu atu finánsia planu estudu komparativu ne’e, entaun tuir planu atu dezloka aranka ba fatin rua ne’e iha loron 07 to’o 10 novembru, kuandu laiha impedimentu seluk,” Maximiano Neno, informa ba Agência Tatoli, iha Oé-Cusse, sesta ne’e.
Nia informa, programa definitivu ne’e hetan ona aprovasaun hosi Prezidente Autoridade RAEOA, no submete ona karta informativu iha Embaxada Indonézia ba Timor-Leste, kona-bá vizita ofisiál ne’e.
“Objetivu prinsipál hosi estudu kompartivu ne’e, primeiru atu haree dezenvolvimentu iha fatin rua ne’e, tanba RAEOA ho NTT fronteira direita ho situasaun hanesan, maibé sira konsege halo liu buat barak hosi ita, intermu organizasaun grupu agrikultór, no grupu seluk ligasaun ho serbisu produsaun ailementár, animál, kooepartiva no grupu arte kultura nian, liuliu soru-tais, homan no seluk tán,” nia afirma.
Nune’e Prezidente Autoridade RAEOA, orienta ba autoridade komunitáriu sira atu ba haree aprende hosi ema-nia esperiénsia, ho intensaun iha futuru bele implementa iha Oé-Cusse, atu reforsa atividade sira-ne’ebé implementa ona.
“Entaun jestór ho xefe sira-ne’ebé atu dezloka ba, atu haree sasán sira-ne’e inklui halo vizita ba iha sede suku no sede postu administrativu ne’ebé mak di’akliu iha distritu rua ne’e, atu hasa’e referénsia oinsá ita bele organiza serbisu sira iha suku bele organizadu,” nia katak.
Nia fundamenta, objetivu seluk hosi estudu komparativu ne’e, bele hametin lazu amizade liuhosi kooperasaun hanesan rai viziñu RAEOA ho NTT, tanba dezde mandatu Prezidente dahuluk, Mari Alkatiri, RAEOA iha ona relasaun ho provínsia NTT, nune’e agora presiza kontinua hametin relasaun ne’e iha aspetu oinoin.
Kona-bá preparasaun liga ho dokumentu sidadaaun Timorense nian, Autoridade RAEOA prepara ona antes fulan ida ba kotuk, tanba ajenda atu dezloka sei hetan akompañamentu hosi autoridade fronteira Timor-Leste ho Indonézia.
Notísia relevante: https://tatoli.tl/2022/09/21/raeoa-sei-hasae-konesimentu-xefe-suku-liuhosi-estudu-komparativu-iha-ntt/
Jornalista : Abílio Elo Nini
Editór : Evaristo Soares Martins
