Top

Baltazar Lemos reeleitu sai Prezidente PSHT períodu 2022-2026

Prezidente PSHT iha Timor-Leste, Baltazar Lemos Seixas, Imajen Tatoli/Francisco Sony.

DILI, 21 outubru 2022 (TATOLI)–Prezidente organizasaun Arte Marsiál Persaudraan Setia Hati Terate (PSHT), Baltazar Lemos Seixas, reeleitu sai Prezidente PSHT períodu 2022-2026 liuhosi kongresu ordináriu ho votu 247 hosi total kongresista 339.

Kongresu ordinariu ne’ebé hala’o iha salaun Lalini Larigutu Komisaun Nasionál Eleisaun (CNE-sigla Portugés) durante loron rua (20-21 outubru) ne’e, kongresista sira aprezenta pakote pakote A mak Baltazar Lemos Seixas no Pedro Aparicio, pakote B mak Jaime Xavier Lopes no Abilio Mesquita.

“Ho nune’e, pakote A konsege gaña votu hamutuk 247 no pakote B hetan de’it votus 65 no votu nulu hamutuk 27. Nune’e, manán-na’in iha eleisaun ne’e mak pakote A Baltazar Lemos Seixas nu’udar prezidente no Pedro Aparicio nu’udar sekretáriu jerál, hosi lidera PSHT períodu 2022-2026,” Prezidente meza, Ambrosio Talo anunsia, sesta ne’e.

Ambrosio Talo hateten, kongresu ordináriu 2022 remata ona ho eleisaun hili Prezidente no Sekretariu Jerál atu hanoin ba oin hodi lidera organizasaun arte marsiál PSHT ne’e ho di’ak durante tinan lima nia laran.

Antes tama ba eleisaun, kongresista sira halo diskusaun ba rejimentu interna PSHT nian no halo diskusaun no aprovasaun ba estatutu organizasaun nian hosi kapitulu ida to ualu ho nia artigu hamutuk 61.

Antes halao eleisaun, Prezidente PSHT Baltazar Lemos hateten, ba oin sei servisu makaas hodi hadi’a organizasaun PSHT no apoiu atividade hotu ne’ebé organiza hosi Governu atu kontribui ba pás no estabilidade iha nasaun ne’e.

“Ba oin ita sei servisu hamutuk atu lori organizasaun ne’e ba oin. Sei kontinua de’it saida mak iha ona no apoiu atividade Governu nian hotu atu kontribui ba dezenvolvimentu nasionál  atu kria pás no estabilidade,” nia dehan.

Organizasaun Arte Marsiál PSHT eduka ema atu sai ema hodi hatene sala no loos hodi fiar ba Maromak tuir relijiaun ida-idak nian, laiha limitasaun suku, relijiaun, rasa no seluk tan maibé ema hotu hanesan de’it.

Nune’e, nia husu ba membru PSHT sira hotu atu hamtauk no hakruuk ba lei ne’ebé vigora iha nasaun RDTL ne’e, labele kontra no halo krime.

“Ami nia membru sira prontu apoiu Governu iha dezenvolvimentu nasionál bainhira Governu presiza,” nia hateten.

Antes me’e, iha kongresu 2009 mosu pakote rua hanesan pakote ida hosi Jaime Xavier Lopes no pakote ida hosi Baltaz Lemos Seixas, ne’ebé to’o ikus Baltazar Lemos mak manán hodi lidera PSHT to’o ohin loron.

Jornalista : Hortencio Sanchez

Editór        : Cancio Ximenes

Publisidade

Leave a Reply

Latest Post

error: Content is protected !!