DILI, 24 outubru 2022 (TATOLI)— Prezidente Repúblika, José Ramos Horta, segunda ne’e, simu karta kredensiál hosi Embaixadór nasaun tolu hanesan Vietname, Austria no Noruega, ne’ebé sei hala’o misaun diplomata iha Timor-Leste.
Embaxadór na’in tolu ne’ebé naun rezidénsia iha Timor-Leste mak Embaixadora Noruega, Ruth Kruger, Embaixadór Thomas Loidl hosi Austria no Embaixadór Ta Van Thong hosi Vietname.
“Ohin, ita iha Embaxadór tolu naun rezidénsia mai aprezenta sira nia kredensiál ba Prezidente Repúblika. Sira hasoru malu ho ita nia Prezidente hodi esforsu hela atu loke sira nia embaixada iha Timor-Leste,” dehan Sekretáriu Jerál Ministériu Negósiu Estranjeiru no Kooperasaun (MNEK), Francisco Cepeda iha Pálasiu Presidensiál, Bairru-Pité.
Emibaxadór naun rezidente hosi Vietname, sei estabelese nia embaixada iha Timor-Leste, bainhira adere ona ba ASEAN.
“Vietname ko’alia barak liu kona-ba oinsa halo kooperasaun ho Timor-Leste, ko’alia mós kona-ba Vietname nia apoiu ba Timor – Leste atu adere lalais ba ASEAN, ko’alia mós kona-ba kooperasaun ne’ebé sira iha ona hanesan investimentu Telemor ne’e bele atrai liután investór bo’ot seluk hosi Vietname atu mai investe iha Timor-Leste,” katak.
Embaxadór nasaun rua seluk hanesan Austria no Noruega tama iha kuadru Uniaun Europeia (UE) no Timor-Leste halo kooperasaun barak ho UE no hetan apoiu barak hosi sira ba oin sei kria tan kooperasaun ne’ebé metin entre Timor-Leste no nasaun rua ne’e.
Alende ne’e, Nasaun Noruega no Austria iha tempu pasadu apoiu maka’as Timor-Leste nia luta ba libertasaun nasionál.
Daudaun ne’e, Embaixadór sira nia rezidensia permanente iha Jakarta-Indonézia, maibé sira esforsu hela atu tau rezidénsia permanente no Embaixada iha Timor – Leste.
Notísia relevante: PR Horta simu karta kredensiál hosi Embaixadór UE
Jornalista: Hortencio Sanchez
Editór : Florencio Miranda Ximenes
