Arsénio Bano lidera eletrisista 23 ba tuir formasaun iha Jakarta
OÉ-CUSSE, 25 outubru 2022 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, tersa ne’e lidera funsionáriu tékniku hosi Departamentu Eletrisidade Timor-Leste (EDTL) na’in-23 atu tuir formasaun eletrikál iha Jakarta, Repúblika Indonézia.
Ekipa dezlokasaun ne’e dirije direita hosi Prezidente Autoridade RAEOA, Arsénio Paixão Bano, konsidera formasaun ne’e importante atu garante kualidade atendimentu iha sentrál elétrika Inur Sakatu ba futuru, bele mellora serbisu operasaun no distribuisaun nian.
“Ha’u ba Jakarta iha objetivu tolu, primeiru prinsipál atu lori ita-nia tékniku EDTL, hosi sentrál elétriku Sakato atu halo formasaun ba iha Wathsila, tanba ita iha kontratu inklui formasaun ba ita-nia tékniku na’in-23, atubele hasa’e koñesimentu, no sei diskute ho wathsila kona-bá 2023 kontratu remata, sei nafatin hetan asisténsia ka lae, tanba Oé-Cusse ahi lakan 24 horas kobre hotu suku 18 iha territóriu Oé-Cusse, tanba ha’u lakohi problema akontese iha komunidade, tán ne’e maka formasaun ne’e importante tebes,” Arsénio Paixão Bano, informa ba jornalista iha fronteira Sakatu-Wini, Oe-Cusse.
Xefe Departamentu EDTL Oé-Cusse, Armindo Mendonça, informa, fatin formasaun sei realiza iha empreza internasionál Wathsila no PT, PLN Bogor Indonézia. Tanba planu no orsamentu atu halo formasaun ba funsionáriu EDTL ajenda ona iha grupu rua, power-plant ho distribuisaun.
Nune’e mós formasaun ne’e halo fazeadamente fahe ba dala-haat, faze dahuluk power-plant ema na’in-hitu, faze daruak ekipa distribuisaun ema na’in-lima, faze datolu power-plant ema na’in-neen no ekipa ikus maka distribuisaun ema na’in-lima.
“Ami ba halo formasaun atu hasa’e kapasidade ba ita-nia funsionáriu sira, sei fokuliu ba melloramentu no operasaun mákina no liña distribuisaun nian. Asuntu rua ne’e mak ita halo formasaun, tanba fatin mós ita konsulta ona, wathsila fasilita formasaun ba mákina hosi power-plant no PT.PLN Bogor fasilita formasaun ba liña distribuisaun nian,” Xefe Departamentu EDTL ne’e hateten.
Nia fó sai katak, formasaun sei fasilita kada grupu durante loron hitu, no distribuisaun nian loron lima, ho objetivu atu hasa’e tán koñesimentu iha área eletrisidade nian.
“Ita-nia objetivu primeiru maka atu hasa’e koñesimentu tanba mudansa globalizasaun entaun ita uza oportunidade ne’e atu fasilita formasaun ba funsionáriu tékniku sira, nune’e iha futuru bele mellora serbisu di’ak liután,” nia afirma.
Jornalista :Abílio Elo Nini
Editór :Evaristo Soares Martins
